Sang Septiembre 7, 2022, gin-finalize sang European Court of Human Rights (ECHR) ang duha ka importante gid nga desisyon sini sa kaso sang mga Saksi ni Jehova. Sang Hunyo 7, 2022, nagdesisyon ang ECHR nga ilegal ang pag-ban sang Russia sa mga Saksi ni Jehova sang 2017. Sa sina man nga adlaw, nakita sang ECHR nga ginlapas sang Lithuania ang European Convention on Human Rights sa kaso ni Brother Stanislav Teliatnikov, nga nangindi nga magsoldado bangod sa iya konsiensia.

Wala nag-apelar ang Russia ukon ang Lithuania sa Grand Chamber sang ECHR para rebyuhon ang Hunyo 7 nga desisyon. Gani, ginmanduan sang ECHR ang duha ka pungsod nga tumanon ang desisyon sang korte, lakip ang pagbayad sang danyos sa mga tawo nga nalapas ang kinamatarong.

Sang Hunyo 11, 2022, nagtinguha ang Russia nga likawan ang iya responsibilidad paagi sa pagbiya sa ECHR. Pero, puede pa desisyunan sang ECHR ang mga kaso batok sa Russia bangod sa mga paglapas sini sa European Convention on Human Rights antes sang Septiembre 16, 2022.

Ginapangamuyo naton nga respetuhon ang gin-finalize nga mga desisyon sang ECHR kag ang kinamatarong sa kahilwayan sa pagsimba, para ang mahidaiton nga mga Cristiano ‘magkabuhi sing matawhay kag malinong nga may bug-os nga diosnon nga debosyon.’—1 Timoteo 2:1, 2.