Si Brother Aleksandr Ursu, nga 78 anyos sadto, naggua sa iya balay sa Dzhankoy, Crimea, para sugataon ang iya bata nga si Viktor sa driveway. Gab-i sadto sang Nobiembre 15, 2018. Natingala si Aleksandr kay may suga sa gua sang ila gate. Hinayhinay sia nga nagpalapit para tan-awon ini sang gulpi lang may nagsinggit: “Dira ka lang, indi maghalin! Pulis ’ni!”

Abi ni Aleksandr ginalangolango lang sia sang iban nga kauturan, pero narealisar gid niya dayon nga indi ini langolango. Gulpi lang sia ginpalapitan sang isa ka lalaki nga may tabon ang guya kag ginbaklid sia sini. Dayon, ginsumbag sia sa sag-ang sang isa pa ka lalaki nga may tabon man ang guya. Anom ka Federal Security Service (FSB) agent nga armado sang mga machine gun ang nagrekisa kay Aleksandr kag kay Viktor antes sila puersa nga nagsulod sa balay.

Ang asawa ni Aleksandr nga si Nina, ara sa kusina sang nagsulod ang mga agent. Ginkuha sang isa ka agent ang cell phone ni Nina kag ginpamangkot sia kon ano ang iya ginatan-aw. Pila ka oras nga ginhalughog sang mga agent ang ila balay pero wala sing nakita nga literatura nga ara sa listahan sang mga publikasyon nga ginakabig nga extremist sa Russia.

Wala pa gin-aresto ining aton tigulang na nga brother nga si Aleksandr. Pero sia kag ang tanan nga Saksi sa Russia kag Crimea nakahibalo nga bisan ano oras mahimo nga i-raid sang mga pulis ang ila balay kag arestuhon sila. Para mabatas ini nga paghingabot, ginapamalandungan ni Aleksandr ang maayo nga halimbawa sang mga miembro sang iya pamilya nga nagpabilin nga matutom, pati man ang iya mismo mga eksperiensia sadto sang ginbatas niya ang paghingabot sang naggahom ang Soviet.

Sang Hulyo 6, 1949, sang siam ka tuig si Aleksandr, puersa nga ginsulod sang mga soldado sang Soviet ang ila balay sang tungang-gab-i kag ginhalughog ini. Ginlapta sang mga soldado sa salog ang tanan nila nga kagamitan, kag ginsugo sila nga mag-empake. Si Aleksandr nagsiling: “Sang wala nagatan-aw ang mga soldado, gintago ni Nanay ang mga literatura base sa Biblia sa amon mga dala, pati ang libro nga Harp of God.” Ang ila bilog nga pamilya gindala sang mga soldado sa estasyon sang tren.

Nagpakita gid sing kaisog ang pamilya ni Aleksandr kay bisan ara na sila sa tren pakadto sa ila bag-o nga ilistaran sa Siberia, nagakanta sila sang mga Kingdom song upod sa iban pa nga mga Saksi sa tren. Nalakip sila sa linibo ka mga kauturan nga gintapok sa Sibera halin sang 1949 asta sang 1951.

Sang panahon sang dekada ’50 sa Siberia, ang mga kauturan tago nga nagatipon sa mga uma para maghiwat sang mga miting. Ang iban nga pamilya nagalakat sang asta 20 kilometros para makatambong sa sini nga mga miting.

Nakabenepisyo gid si Aleksandr sa maayo nga halimbawa sang mga miembro sang iya pamilya nga nagpabilin nga matutom. Ang iya lolo sa tuhod nga si Makar; ang iya lolo nga si Maksim; ang iya tiyo sa tuhod nga si Vladimir; kag ang iya tatay nga si Pyotr, dalayawon gid nga halimbawa sang mainunungon nga pagbatas.

Sang 1944, ang tatay ni Aleksandr ginsentensiahan nga mapriso sang pulo ka tuig bangod indi sia magsoldado. Ginpagua sia sa prisuhan pagkatapos sang tatlo ka tuig kay naparalisado sia bangod nabali ang iya taludtod. Madumduman pa ni Aleksandr nga ginaistoryahan sia sang iya tatay sang mga istorya sa Biblia ni David, ni Goliat, kag sang pag-abyanay ni David kag ni Jonatan.

“Ang akon tiyo nga si Vladimir,” siling ni Aleksandr, “pirme gid nagapamati sa WBBR kag nakabaton sia sing mga literatura base sa Biblia. Ilegal sadto ang pagpanag-iya sang radyo, gani naghimo sia sing bunker para indi sila madakpan kon magpamati sila sang kaupod niya nga mga interesado sa gina-broadcast sang WBBR.”

Sang mga dekada ’40, ginsugid sang isa ka “interesado” ang nahamtangan sang ila bunker. Gani, ang tiyo ni Aleksandr kag ang iya lolo gin-aresto kag ginpriso sa Khotyn, sa nakatundan sang Ukraine, nga mga 80 kilometros halin sa ila baryo.

“Para mabisitahan sila, ginalakat lang ni Lola pakadto sa prisuhan. Ginaistorya ni Lola nga bangod sa ila pagtuo malipayon sila gihapon, pero bal-an ni Lola nga ginakastigo sila.” Makapasubo nga ang tiyo kag lolo ni Aleksandr napatay sa prisuhan.

“Asta subong wala gihapon kami kabalo kon ano ang natabo sa ila, kon paano sila gintrato, kon paano sila napatay, kag kon diin sila ginlubong,” siling ni Aleksandr. “Pero napalig-on kami kay bal-an namon nga nagpabilin sila nga matutom kay Jehova asta sa ila kamatayon.”

Ang maayo nga halimbawa sang mga miembro sang iya pamilya nga nagpabilin nga matutom kag ang iya mismo eksperiensia sa Siberia nakabulig sa iya nga mangin handa sa paghingabot subong. Sia nagsiling: “Naanad na ako nga pirme lang gina-raid halin sang bata pa ako. Wala kami ginpabay-an ni Jehova sadto kag kabalo ’ko nga indi man sia magpabaya subong.”

“Ang dugang pa nga nagapabakod sa akon,” siling ni Aleksandr,” amo ang pagtuon sa Biblia adlaw-adlaw kag pagpamalandong, regular nga pagtambong sa miting, kag pagpakig-istorya sa mga kauturan.”

Regular man niya nga ginabasa ang parte sa iban nga mga kauturan nga ginhingabot man kag nagapalig-on ini sa iya. “Nabasa ko ang ginsiling sang iban sa ila sa atubang sang korte sang naghatag sila sang ila katapusan nga mensahe,” siling niya. “Ang ila maisog nga testimonya katumanan sang tagna ni Jesus: ‘Dalhon kamo sa atubangan sang mga gobernador kag mga hari tungod sa akon, agod makapanaksi kamo sa ila kag sa mga pungsod tuhoy sa akon.’”—Mateo 10:18.

Ang aton mga kauturan nagabatas kag nagapabilin nga mabakod bisan pa may paghingabot. Nangin posible ini paagi sa mahigugmaon nga bulig sang aton Dios nga si Jehova. Sila ang buhi nga ebidensia nga matuod gid ang ginsiling ni David sang gingiyahan sia sang Dios nga isulat: “Ang tanan nga nagadangop [kay Jehova] magakasadya; magahugyaw sila pirme sa kalipay.”—Salmo 5:11.