Sang Agosto 2, 2024, gin-release ni Brother Carlos Hortelão, miembro sang Branch Committee sa Angola ang Bag-ong Kalibutan nga Badbad Sang Cristianong Griegong Kasulatan kag ang mga libro sa Biblia nga Genesis, Rut, Ester, kag Jonas sa Ibinda nga lenguahe. Ginpahibalo ini sa una nga adlaw sang 2024 ‘Ibantala ang Maayong Balita!’ nga Rehiyonal nga Kombension sa Cabinda, Angola. May 953 nga nag-attend sa sini nga programa. Ang tanan nga ara didto nakabaton sang naimprinta nga kopya sang Bag-ong Kalibutan nga Badbad Sang Cristianong Griegong Kasulatan. Puede na dayon ma-download sa jw.org kag sa JW Library nga app ang Cristianong Griegong Kasulatan kag ang mga libro sa Hebreong Kasulatan.

Sobra 716,000 ka tawo nga nagahambal sang Ibinda ang nagaistar sa Angola. Amo ini ang pinakauna nga translation sang Biblia sa Ibinda. Nalipay gid ang 335 ka kauturan sa 13 ka kongregasyon kag isa ka group nga nagahambal sang Ibinda sa sini nga pungsod kay may ara na sila Pulong sang Dios sa ila lenguahe.

Sang Agosto 9, 2024, gin-release ni Brother Energy Matanda, miembro sang Branch Committee sang Zimbabwe, ang Bag-ong Kalibutan nga Badbad Sang Cristianong Griegong Kasulatan sa Zimbabwe Sign Language. Ginpahibalo ini sa 2024 ‘Ibantala ang Maayong Balita!’ nga Rehiyonal nga Kombension sa Harare, Zimbabwe. Sa kabilugan, may 405 nga nag-attend sa programa. Puede na ini dayon ma-download sa jw.org kag sa JW Library Sign Language nga app.

Ang libro sang Mateo gin-release sa Zimbabwe Sign Language sang 2021. Sugod sadto, amat-amat nga nangin available ang iban pa nga mga libro sang Cristianong Griegong Kasulatan. Ginabanta nga mga isa ka milyon ka tawo ang nagagamit sang Zimbabwe Sign Language, lakip ang 377 ka kauturan sa 11 ka sign-language nga mga kongregasyon kag 11 ka group sa bilog nga Zimbabwe.

Sang Agosto 11, 2024, gin-release ni Brother Mark Sanderson, miembro sang Nagadumala nga Hubon, ang gin-revise nga Bag-ong Kalibutan nga Badbad sang Balaan nga Kasulatan sa Bulgarian. Gin-release man ang mga libro sa Biblia nga Mateo, Marcos, kag Lucas sa katapusan nga pamulongpulong sang 2024 ‘Ibantala ang Maayong Balita!’ nga Special Convention sa Sofia, Bulgaria. Sa kabilugan, 5,418 ang nag-attend. Puede na dayon ma-download sa jw.org kag sa JW Library nga app ining tatlo ka libro sa Biblia.

Ang Bag-ong Kalibutan nga Badbad sang Balaan nga Kasulatan una nga gin-release sa Bulgarian sang 2009. Subong, halos 3,000 ka kauturan ang nagaalagad sa 57 ka kongregasyon sa bilog nga Bulgaria.

Sang Agosto 16, 2024, gin-release ni Brother Bois Sylvain, miembro sang Branch Committee sang West Africa, ang libro sa Biblia nga Mateo kag Marcos sa Aja nga lenguahe. Gin-release ini sa 2024 ‘Ibantala ang Maayong Balita!’ nga Rehiyonal nga Kombension sa Djakotomey, Benin. Ginpahibalo ini sa 631 nga nag-attend. May 435 man nga nag-tie in sa pamulongpulong paagi sa videoconference halin sa Assembly Hall sa Abomey-Calavi, Benin. Puede na dayon ma-download sa jw.org kag sa JW Library nga app ining duha ka libro.

Sobra 1.2 ka milyon ka tawo sa Benin kag Togo ang nagahambal sang Aja. May duha pa ka iban nga translation sang Cristianong Griegong Kasulatan sa Aja. Pero, mabudlay ini matigayon, kag nagagamit ini sang lenguahe nga indi hapos maintiendihan sang kalabanan nga nagabasa sini. Dugang pa, indi mabasa sa sini nga mga translation ang ngalan sang Dios nga Jehova. Subong, halos 1,300 ka kauturan nga nagahambal sang Aja ang nagaalagad sa 25 ka kongregasyon kag isa ka group sa Benin kag sa 12 ka kongregasyon kag 2 ka group sa Togo. Excited gid ang tanan nga makabaton sang maathag nga translation nga nagbalik sang ngalan sang Dios sa insakto nga lugar sini.

Sang Agosto 16, 2024, gin-release ni Brother Jeffrey Winder, miembro sang Nagadumala nga Hubon, ang gin-revise nga Bag-ong Kalibutan nga Badbad sang Balaan nga Kasulatan sa Kinyarwanda nga lenguahe. Ginpahibalo ini ni Brother Winder sa una nga adlaw sang 2024 ‘Ibantala ang Maayong Balita!’ nga Rehiyonal nga Kombension sa Kigali, Rwanda. May 9,908 nga nag-attend sa sini nga kombension. Kag may 1,141 nga nag-tie in sa programa sa duha pa ka lugar nga ginhiwatan sang kombension. Ang tanan nga nag-attend sa sini nga mga lokasyon nakabaton sang naimprinta nga kopya sini nga Biblia. Available na dayon ang mga audio recording kag puede na ma-download ang digital nga pormat sang gin-revise nga edition sang Bag-ong Kalibutan nga Badbad sa Kinyarwanda sa jw.org kag sa JW Library nga app.

Sobra 13 ka milyon ka tawo ang nagahambal sang Kinyarwanda sa Rwanda. Ginahambal man ang Kinyarwanda sa iban nga mga pungsod pareho sang Democratic Republic of the Congo, Tanzania, kag Uganda. Ang kompleto nga Bag-ong Kalibutan nga Badbad sang Balaan nga Kasulatan una nga gin-release sa Kinyarwanda sang 2010. Subong, sobra 35,500 ka kauturan ang nagaalagad sa 634 ka kongregasyon nga nagahambal sang Kinyarwanda sa bilog nga Rwanda.

Sang Agosto 16, 2024, gin-release ni Brother David Splane, miembro sang Nagadumala nga Hubon, ang gin-revise nga Bag-ong Kalibutan nga Badbad sang Balaan nga Kasulatan sa Sinhala nga lenguahe. May 4,273 nga nag-attend sa una nga adlaw sang programa sang 2024 ‘Ibantala ang Maayong Balita!’ Rehiyonal nga Kombension sa Colombo, Sri Lanka. Dugang pa, ang 1,045 nga nag-attend sa rehiyonal nga kombension sa siudad sang Chilaw, Sri Lanka, nag-tie in man sa programa paagi sa videoconference. Ang mga nag-attend sa duha ka lokasyon nakabaton sang naimprinta nga kopya sang Bag-ong Kalibutan nga Badbad sa Sinhala. Puede na dayon ma-download ang digital nga pormat sa jw.org kag sa JW Library nga app.

Nagsugod sa pag-translate sang base sa Biblia nga mga publikasyon ang mga Saksi ni Jehova sa Sinhala sobra 75 ka tuig na ang nagligad. Subong, sobra 15 ka milyon ka tawo ang nagahambal sang Sinhala sa Sri Lanka, lakip ang 4,808 ka kauturan nga nagaalagad sa 62 ka kongregasyon nga nagahambal sang Sinhala.

Sang Agosto 30, 2024, gin-release ni Brother Martin Décousus, miembro sang Branch Committee sa New Caledonia, ang kompleto nga Bag-ong Kalibutan nga Badbad sang Balaan nga Kasulatan sa 2024 ‘Ibantala ang Maayong Balita!’ nga Rehiyonal nga Kombension. Ginhiwat ang kombension sa siudad sang Nouméa, New Caledonia, kag sa baryo sang Mala’e sa Wallis and Futuna. Konektado ang duha ka lokasyon paagi sa videoconference. Ang tanan nga 317 nga nag-attend nakabaton sang naimprinta nga kopya sang Bag-ong Kalibutan nga Badbad. Puede na dayon ma-download ini nga Biblia sa jw.org kag sa JW Library nga app.

Gin-release ang Bag-ong Kalibutan nga Badbad Sang Cristianong Griegong Kasulatan sa Wallisian sang 2018. May 153 ka kauturan nga nagahambal sang Wallisian sa duha ka kongregasyon sa New Caledonia kag sa Wallis and Futuna. Excited na gid sila nga gamiton ining kompleto nga Bag-ong Kalibutan nga Badbad para ibantala ang maayong balita sa sobra 35,000 ka tawo nga nagahambal sang Wallisian sa sini nga mga isla.