Sang Hunyo 1, 2023, madamo nga mga pasilidad sang Bethel sa bilog nga kalibutan ang nagbukas para sa mga tour. May mga tour na liwat sa tapos nga nauntat ini sing sobra tatlo ka tuig bangod sang COVID-19 nga pandemic. Espesyal gid ini nga adlaw para sa mga miembro sang Bethel family sa bilog nga kalibutan kag sa linibo nga nagkadto para mag-tour.

Samtang nagaabot ang mga bisita, gina-greet sila sang mga Bethelite paagi sa mga welcome sign, pagkanta, pagyuhum, kag paghakos. Si Ellis Bott, nga nagsugod sa pag-alagad sa world headquarters sa Warwick, New York sang pandemic, nagsiling: “Kanami gid makita ang mga Bethelite sa gua sang lobby nga may dala nga mga welcome sign! Sang nakita ko nga naghibi sila bangod sang kalipay, ginpahanumdom ako sini nga espesyal gid nga lugar ang Bethel.” Si Alexis Alexander, nga isa ka part-time commuter Bethelite, excited gid sa pagtamyaw kag pag-abiabi sa mga bisita. Nagsiling sia: “Espesyal gid para sa akon nga makita ang gugma sang mga kauturan kay Jehova kag sa Iya balay.”

Excited gid si Mi-yeon Jo nga madala ang iya otso anyos nga bata nga si Yoon sa pag-tour sa branch office sang South Korea. Excited gid katama si Yoon amo nga daw indi sia makatulog sang gab-i antes sang ila tour. Si Mi-yeon nagsiling: “Pagbugtaw gid namon, namati kami sa kanta ni Caleb kag Sophia nga nagabisita sa Bethel. Kag ginpatokar pa ini namon sa salakyan samtang nagapakadto kami sa branch.” Nag-enjoy gid si Yoon amo nga nakasiling sia: “Kulang na lang sang mga sapat, mangin paraiso na dayon ang Bethel.”

Si Noah Johnsen, nga isa ka pamatan-on nga lalaki halin sa Alberta, Canada, nga may spinal muscular atrophy, gusto gid mag-tour sa pasilidad sang Bethel sa New York, U.S.A. Pero bangod sang iya kondisyon, indi sia puede makabiyahe paagi sa eroplano. Gani, nagbiyahe sila sang iya mga ginikanan sa salakyan sing mga 4,100 ka kilometro para mag-tour sa branch sa United States sa Wallkill, New York. Sang ginpamensar niya ang iya pagbisita, si Noah nagsilling: “Isa lang ka tinaga ang masiling ko—gugma. Nabatyagan ko gid ang gugma ni Jehova kag sang mga kauturan.”

Excited gid ang setentay-seis anyos nga si Fyodor Zhitnikov kag ang iya asawa nga si Yulita sang nag-tour sila sa museum sa pasilidad sang Bethel sa Kazakhstan. Makita sa isa ka seksion sang museum ang kasaysayan sang pila ka kauturan nga dinekada nga nagbatas sing matutom. Nanamian gid sa sini si Fyodor kay nakaupod niya ang madamo sa ila sa pag-alagad kay Jehova. Nagapasalamat gid si Fyodor sa pagpangabudlay sang mga kauturan para mahimo ini nga eksibit. Sia nagsiling: “Kon ginadumdom sang mga kauturan ang aton pagministeryo kag hinimuan, mas ginadumdom pa gid ini ni Jehova kag ginaapresyar niya gid ang ginhimo sang kada isa sa aton.”

Nalipay gid kita nga ma-welcome liwat ang mga bisita sa mga pasilidad sang Bethel sa bilog nga kalibutan. Ginapaabot naton nga i-welcome ang linibo pa sa sunod nga mga inadlaw!—Salmo 122:1.

Makita sa ubos ang mga piktyur sang aton mga kauturan nga naga-tour sa sarisari nga mga pasilidad kag museum sang Bethel.