Sang Septiembre 2023, ang mga Saksi ni Jehova sa bilog nga kalibutan nagpakigbahin sa isa ka pinasahi nga kampanya para ibantala ang Ginharian sang Dios. Gingamit ang Lalantawan Num. 2 2020, nga may tig-ulo “Ano ang Ginharian sang Dios?.” a Ang masunod nga mga eksperiensia nagapakita sang maayo nga resulta sa mga tawo sini nga kampanya sa bilog nga duta.

Sa tion sang kampanya, si Mark kag ang iya pulo ka tuig nga bata nga si Flynn, halin sa Southport, England, nakaistorya sa isa ka babayi sa una nga balay nga ila ginbantalaan. Excited nga ginkuha sang babayi ang Lalantawan sa kamot ni Mark kag gintudlo ang pamangkot sa cover. Nagsiling sia: “Indi ako makapati nga ari kamo sini nga adlaw! Kinahanglan ko gid ang sabat sa sini nga pamangkot subong.” Nagsiling sia nga ang iya bata nga lalaki wala lang dugay napatay kag gusto niya makabaton sang paumpaw. Ginsugiran sia dayon ni Mark sang promisa sang Ginharian nga may pagkabanhaw. Natandog gid ang iya tagipusuon kag gusto pa niya makatuon sing dugang. Sang nagbalik si Mark kag si Flynn, ginbaton sang babayi kag sang iya bana ang Magkabuhi sing Wala Katapusan! nga brosyur kag nasugdan ang pag-Bible study.

Samtang nagapila sa isa ka medical center sa Indonesia, ang brother nga si Frederick nagpakig-istorya sa isa ka lalaki nga nagahulat man upod sa iya bata nga lalaki. Wala madugay, ginsugid ni Frederick ang promisa sang Biblia nga ang mga balatian kag pag-antos malapit na lang madula. Pagkatapos niya ginpabasa sa tatay ang ginsiling ni Jesus parte sa Ginharian sang Dios sa Mateo 6:9, 10, namangkot si Frederick sa iya: “Ti, paano dulaon ang pag-antos?” Nagsabat ang lalaki: “Paagi sa Dios kag sa iya Ginharian.” Dayon namangkot ang lalaki kon ano ang Ginharian sang Dios, pero sa sina nga tion, gintawag na ang ngalan sang iya bata nga lalaki para sa iya appointment kag kinahanglan na nila maghalin. Dalidali nga ginhatag ni Frederick ang iya address kag ang kopya sang Lalantawan sa lalaki. Pagkasunod nga aga, nakibot gid si Frederick kay ang tatay kag ang nanay nagkadto sa iya balay kag gusto makatuon sing dugang pa parte sa mga pagpakamaayo nga ihatag sang Ginharian sang Dios. Nalipay gid si Frederick nga maghimo sang iskedyul para padayunon ang ila pag-istoryahanay.

Sa Malawi, gintanyagan sang duha ka sister sang Lalantawan ang village chief sa ila lugar kag ginsugid nga sa indi madugay ang Ginharian sang Dios magagahom na sa bilog nga duta. Namangkot ang village chief: “Buot bala silingon nga sa ulihi wala na ako sang ginharian?” Sa tapos mapakita sa iya kon ngaa ang Ginharian sang Dios lang ang solusyon sa mga problema sang mga tawo, nagsiling ang chief: “Maayo gid ini nga balita. Isa ako ka chief, pero nabal-an ko nga bisan ang mga chief indi makahimo sang mga butang nga mahimo sang Ginharian sang Dios para sa mga tawo sa bilog nga kalibutan.” Nangayo dayon sang lima pa ka kopya sang Lalantawan ang chief para ihatag sa iban pa nga mga village chief. Nagsiling man sia nga gusto niya makapakig-istorya liwat parte sa Biblia.

Samtang nagasakay sa bus sa Puebla, Mexico, ang isa ka sister namangkot sa tigulang nga lalaki kon puede niya sia masugiran sang isa ka makapalig-on nga mensahe. Nagsugot ang lalaki, gani ginbasa niya ang ginsiling ni Jesus parte sa Ginharian sang Dios sa Mateo 6:9, 10. Namangkot ang lalaki: “Ano ang Ginharian sang Dios? Wala pa gid ako nakabasa sang Biblia ukon nakapakig-istorya sa mga Saksi ni Jehova sang una.” Ginsabat sang sister ang iya pamangkot paagi sa pagpakita sa iya sang Lalantawan sa iya cellphone. Dayon madamo pa gid sang pamangkot ang lalaki, gani ginsugid sang sister kon paano niya gamiton ang JW Library nga app para makita niya ang sabat sa iya mga pamangkot. Sang nakita niya nga gamay na lang ang iya storage space sa iya cellphone, ginpang-delete niya ang iban nga file kag nagsiling: “Mas importante ang pagtuon parte sa Ginharian sang Dios.” Sang nanaug na sila sa bus, naubos niya basa ang bilog nga Lalantawan, nabinagbinag nila ang una nga leksion sang Magkabuhi sing Wala Katapusan!, kag nagpasugot ang lalaki nga magpa-Bible study. Sulitsulit nga ginpasalamatan niya ang sister kag nagsiling nga gusto niya mag-attend sa aton mga miting sa Kingdom Hall.

Samtang nagapamalaybalay sa New Zealand, ginsugid sang isa ka brother nga si Ben sa isa ka bataon nga nanay nga sa indi madugay paumpawan sang Ginharian sang Dios ang tanan nga nagaantos. Nagsiling ang babayi: “Maayo kay nagkadto ka diri! Nabudlayan ako magtulog kagab-i kay grabe ang akon kabalaka sa palaabuton.” Nagtulo ang iya luha samtang ginabasa ni Ben ang Bugna 21:4 kag ginsugid sa iya kon paano dulaon sang Ginharian ang balatian kag kamatayon. Ginbaton niya sing malipayon ang Lalantawan kag nagsiling nga gusto niya nga basahon ini kag magtuon sing dugang pa parte sini.

Sa isa ka refugee camp sa South Sudan, madamo ang gusto makatuon parte sa Ginharian sang Dios. Sa sulod lang sang duha ka oras, ang aton mga utod nakapanagtag sing halos 1,000 ka publikasyon, lakip ang Lalantawan. Ang isa ka refugee nagsiling: “Nag-abot gid kamo sa insakto nga tion. Amo gid ’ni ang kinahanglan namon!” Ang isa pa ka refugee nagsiling sa aton mga utod: “Madamo gid nga salamat sa pagdumdom sa amon. Kabalo kami nga layo pa ang inyo ginhalinan, pero palihug balik kamo liwat.”

Naistorya sang duha ka sister sa Taiwan ang isa ka lalaki nga nasubuan gid sa natabo nga sunog sa Hawaii. Ginpakita sa iya sang isa ka sister ang Lalantawan nga may piktyur sang Paraiso sa duta sa palaabuton. Nagsiling ang lalaki: “Maayo gid kon ang duta mangin pareho sa sini nga piktyur. Sa sining kalibutan nga puno sang malain nga balita, kanami gid makabati sang makapaumpaw nga mensahe sang paglaum.”

Isa gid ka pribilehiyo nga makapakigbahin sa sini nga kampanya kag makabulig sa mga tawo nga makita nga ang Ginharian sang Dios lang ang makahatag sang matuod nga paumpaw kag paglaum.—Roma 15:4.

Makita sa ubos ang mga piktyur sang aton mga kauturan sa sarisari nga mga pungsod nga malipayon nga nagpakigbahin sa bilog kalibutan nga kampanya.