SEPTIEMBRE 4, 2023
BALITA SA BILOG NGA KALIBUTAN

Ginpabakod ang Pagtuo Imbes nga Mahadlok

I-PLAY

Sa indi madugay, ipahibalo sang Gagarinskiy District Court of Sevastopol, Crimea, ang desisyon sini sa kaso ni Brother Viktor Kudinov kag Brother Sergey Zhigalov. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Viktor Kudinov

Natawo: 1969 (Budapest, Hungary)

Biograpiya: Nag-obra bilang drayber sang bus

Napangasawa niya si Svetlana sang 1991. May isa sila ka bata nga lalaki kag isa ka bata nga babayi

Nagpa-Bible study man sia upod kay Svetlana sang nakita niya ang maayo nga epekto sini sa ila pamilya. Nabawtismuhan si Svetlana sang 2005 kag si Viktor sang 2010

Ang Iya Ginsiling

Paano ka napabakod sang mga eksperiensia sang iban?

Ginapamensar ko gid ang iban pareho kay Brother Viktor Stashevskiy. Napriso sia kag mabudlay gid ini para sa iya. Nakabaton ako sang pila ka sulat halin sa iya, kag nakita ko nga wala sia nagapokus sa iya kaugalingon. Ginapakita niya ang iya interes kag pag-ulikid sa iban, kag padayon nga nangin malipayon. Si Viktor kag ang iban pa nga mga kauturan nagpakita gid sang maayo nga halimbawa sa akon. Ginahingabot sila kag kinahanglan pa nila atubangon ang mga kabalaka sa kabuhi adlaw-adlaw pareho sang problema sa panglawas, pagpangita sang kuarta, kag pag-atipan sa ila mga pamilya. Puede kuntani nga mag-untat na lang sila sa pag-alagad para indi na sila paghingabuton. Pero padayon sila nga nangin matutom kay Jehova kag sa ila mga kauturan. Sang nakita ko ang tanan nga ginbatas nila, nabal-an ko nga masarangan ko man ini.

Sergey Zhigalov

Natawo: 1971 (Snezhnoye, Ukraine)

Biograpiya: Nag-obra bilang tubero

Sang 1994, nagpa-Bible study sia sa mga Saksi ni Jehova. Nagdayaw sia sa kaalam kag sa insakto nga katumanan sang mga tagna sa Biblia. Nabawtismuhan sia sang 1996

Napangasawa niya si Olga sang 2007

Ang Iya Ginsiling

Ano ang natun-an mo parte kay Jehova sa sining mabudlay nga sitwasyon?

Bisan pa ginatugutan ni Jehova ang paghingabot, nabal-an ko nga mahimo sia mangin bisan ano nga kinahanglanon para amligan kag paumpawan ako sa espesyal nga paagi. Naintiendihan ko na subong nga importante gid ang Isaias 30:15, nga nagasiling: “Mangin mabakod kamo kon magpakalinong kamo kag magsalig sa akon.” Nakabulig ini para indi ako mag-imadyin sang malain nga mga butang nga posible matabo sa akon. Nabal-an ko nga kon magkahadlok ako, indi ko gid maalagad sing matutom si Jehova. Kon himuon ko ina, daw pareho lang nga ginapunggan ko ang akon kaugalingon nga alagaron si Jehova. Amo gid sina ang ginapaabot ni Satanas nga himuon ko. Pero, samtang ginapakita ko ang bug-os nga pagsalig kay Jehova, may kalinong ako nga ang Dios lang gid ang makahatag. Kag ina nga kalinong nakapabakod sa akon.

Sigurado kita nga padayon nga pakamaayuhon ni Jehova si Viktor kag si Sergey sa ila pasensia kag pagbatas kay Sia isa ka Dios “nga nagakalipay sa paghidait sang iya alagad.”—Salmo 35:27.

Time Line

Agosto 24, 2022

Ginsugdan ang kaso. Gin-raid ang ila mga balay. Gin-aresto sila kag gindala sa temporary detention facility
Agosto 26, 2022

Gin-release sila sa detention facility pero gin-house arrest
Oktubre 17, 2022

Gin-untat ang pag-house arrest sa ila pero ginbutangan sang mga restriksion
Abril 13, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Crimea

Ang mga Saksi ni Jehova sa Crimea ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE