Sang Nobiembre 2021, nagpanagtag ang mga Saksi ni Jehova sa bilog nga kalibutan sang Ang Lalantawan Num. 2 2021 nga publiko nga edisyon sa sobra 300 ka lenguahe. Para sa pito sini nga mga lenguahe, ang Num. 2 2021 nga isyu sang Ang Lalantawan amo ang una nga na-translate. Ini nga mga lenguahe amo ang: Faroese, Hawaii Pidgin, Luxembourgish, Manipuri (Roman), Odia, Pomeranian, kag Saint Lucian Creole.

Si Brother Nicholas Ahladis, nga nagaobra sa Translation Services sa world headquarters, nagsiling: “Ang impormasyon sa aton mga publikasyon makawiwili sa tanan nga sahi sang tawo. Pero limitado ang mahimo sang pila ka translation team, amo nga indi posible nga ma-translate nila ang kada isyu sang Ang Lalantawan. Ang mga Branch Committee nga nagadumala sini nga mga translation team puede makasulat sa Writing Committee sang Nagadumala nga Hubon kag magrekomendar kon ano nga mga topiko ang i-translate sang mga translation team. Amo sini ang natabo sa Num. 2 2021 nga isyu sang Ang Lalantawan kag kon ngaa na-translate ini sa sini nga mga lenguahe.”

Ari ang pila ka eksperiensia sa sini nga mga lenguahe nga nagapakita sang maayo nga resulta sini nga kampanya. Ginapakita man sini ang maayo nga resulta sang aton padayon nga panikasog nga mapanagtag ang base sa Biblia nga impormasyon sa tanan nga lenguahe sang mga tawo.

Nalipay gid kita nga madamo nga tawo ang nakabasa sang Ang Lalantawan sa sining espesyal nga kampanya. Nahibaluan naton nga ining mga kampanya nagasuportar sa kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.”—1 Timoteo 2:4.