Sang Abril 8, 2024, isa ka total solar eclipse ang nakita sa pila ka lugar sa North America. Minilyon ka tawo ang nagkadto para makita ini nga eclipse, kag malayo pa ang ginbiyahe sang iban. May gin-organisar nga isa ka espesyal nga pagbantala sa sobra 24 ka siudad kon diin makita ang eclipse. Ang mga Saksi ni Jehova sa Canada, Mexico, kag United States nagpartisipar sa sini nga pagbantala, paagi sa pag-display sang mga cart nga may base sa Biblia nga mga publikasyon sa mga 15 ka lenguahe.

Sa Carbondale, Illinois, U.S.A., may duha ka estudyante sa college nga nagpalapit sa isa sa aton mga cart. Ang isa sa mga sister nakig-istorya sa ila gamit ang pamangkot sa cart nga, “Gintuga Bala ang Kabuhi?” Samtang nagaistorya sila, ang isa sa mga lalaki namangkot, “Kon may Dios kag kon palangga niya kita, ngaa ginatugutan niya ang pag-antos?” Ginpakita sang sister sa iya kon paano gamiton ang jw.org para makita ang sabat. Nanamian gid ining duha ka estudyante sa isa sa aton mga video nga nagasabat sining pamangkot. Nagsiling sila nga gusto pa gid nila magtuon sing dugang kag isugid nila ang ila natun-an sa ila mga abyan.

Ang isa ka bataon nga lalaki nga nagahambal sang Punjabi sa Sherbrooke, Quebec, Canada, nanamian gid sang ginbugno sia sang sister nga nagabantay sa cart gamit ang iya lenguahe nga Punjabi. Nag-istoryahanay sila bangod sining simple nga pagtamyaw kag ginpakita sa iya sang sister kon paano mag-Bible study paagi sa paggamit sang Magkabuhi sing Wala Katapusan! nga brosyur. Nakibot ang lalaki nga puede sia maka-Bible study sa oras kag lugar nga gusto niya, kag bisan paagi sa videoconference. Naghimo sang kahimusan ang sister para ma-Bible study sang isa ka brother ini nga lalaki.

Ang isa ka sister nga nagabantay sang cart sa Evansville, Indiana, U.S.A., nakapakig-istorya sa isa ka babayi nga nagsiling nga nagsaylo sia sa sini nga lugar para atipanon ang iya nagamasakit nga nanay. Nagsiling ang sister nga ginaatipan man niya ang iya nanay kag naintiendihan niya nga mabudlay gid ini himuon. Dayon ginbasa sang sister ang makapaumpaw nga mensahe sa Isaias 33:24 kag Bugna 21:4. Nanamian gid ang babayi sa sini nga mga promisa sa Biblia, gani ginpabasa niya ini liwat sa sister. Nami gid ang ila istoryahanay, gani ginkasugtan nila nga padayunon ang ila istoryahanay parte sa Biblia.

Nagakalipay kita nga gingamit sang aton mga kauturan sa bilog nga North America ining solar eclipse para tudluan ang iban parte sa aton “Daku nga Manunuga” kag sa iya matahom nga mga promisa.—Manugwali 12:1, 2.