Sang Huebes, Marso 14, 2019, ang Bagyo Idai nag-landfall sa Mozambique kag nagwaswas ini asta sa Malawi kag Zimbabwe. Isa ini sa pinakamabaskog nga bagyo nga nag-igo sa Southern Hemisphere, kag ginguba sini nga bagyo ang mga karsada kag mga tinukod, kag sobra sa 2.6 ka milyon ka tawo ang naapektuhan. Sobra na 200 ang kompirmado nga napatay. Makapasubo nga nalakip sa mga napatay ang duha ka sister kag duha ka indi bawtismado nga bata sa Mozambique kag isa ka 14-anyos nga brother sa Zimbabwe nga napatay sang gin-anod sang mudslide ang ila balay.

Ang sanga sa Mozambique nagreport nga madamo nga balay sang aton kauturan kag mga Kingdom Hall ang naguba ukon nawasak gid. Sa Zimbabwe, ginkompirmar sang sanga nga 15 ka balay sang aton kauturan kag 2 ka Kingdom Hall ang naguba. Sa Malawi, ang sanga nagreport nga 764 ka balay sang aton kauturan ang naguba kag 201 ang nawasak gid. Duha man ka Kingdom Hall ang naguba. Anom ka Disaster Relief Committee, duha sa Mozambique kag apat sa Malawi, ang ginporma para mag-organisar sang pagbulig sa mga biktima.

Nagakasubo kita para sa aton kauturan nga nagaantos bangod sang mga kalamidad. Ginapangamuyo naton nga ang tanan nga manugbantala nga naapektuhan padayon nga magasalig nga hatagan sila ni Jehova sing paghidait nga kinahanglan gid nila.—Roma 15:13.