Sugod sang Septiembre 11, 2024, ang Bagyo Boris nagdala sang mabunok nga ulan kag mabaskog nga hangin sa pila ka lugar sa Central Europe. Nagwaswas ini sa southern Poland sang Septiembre 12. Wala pa 24 ka oras, nakalab-ot na sa 20 ka sentimetro ang ulan gani madamo nga banwa ang nabahaan. Ining sigesige nga pag-ulan nagguba sang mga dalan kag mga taytay kag linibo ang nadulaan sang kuryente. Pagkasunod nga adlaw, Septiembre 13, ang Bagyo Boris nagbubo sang sobra 50 ka sentimetro nga ulan sa mga lugar sa northern nga bahin sang Czech Republic. Bangod sini, madamo nga mga balay, mga dalan, kag mga taytay ang naguba.

Dayon, sang Septiembre 14, nagbubo ang mga 25 ka sentimetro nga ulan sa madamo nga baryo sa Romania nga nagresulta sa flash flood. Mga 5,000 ka balay ang naguba kag duha ka dam ang nag-awas sa Galați County. Sang Septiembre 18, ang Bagyo Boris nagwaswas man sa northern Italy. Sa sulod lang sang mga 48 ka oras, nagbubo ang halos 30 ka sentimetro nga ulan sa madamo nga lugar gani nag-awas ang mga suba kag ang iban pa nga alagyan sang tubig.

Bangod sining mabaskog nga bagyo, linibo ang nagbakwit sa sining apat ka pungsod kag indi magnubo sa 19 ang napatay.

Czech Republic

• Wala sang utod nga napatay ukon nasamaran

• 79 ka manugbantala ang nagbakwit

• 12 ka balay ang may daku nga guba

• 2 ka balay ang may gamay nga guba

• 1 ka Kingdom Hall ang may daku nga guba

• 1 ka Kingdom Hall ang may gamay nga guba

Italy

• Wala sang utod nga napatay ukon nasamaran

• 63 ka manugbantala ang nagbakwit

• 7 ka balay ang may daku nga guba

• 21 ka balay ang may gamay nga guba

• 1 ka Kingdom Hall ang may daku nga guba

• 4 ka Kingdom Hall ang may gamay nga guba

Poland

• Wala sang utod nga napatay ukon nasamaran

• 87 ka manugbantala ang nagbakwit

• 61 ka balay ang may daku nga guba

• 85 ka balay ang may gamay nga guba

• 2 ka Kingdom Hall ang may daku nga guba

• 8 ka Kingdom Hall ang may gamay nga guba

Romania

• Wala sang utod nga napatay ukon nasamaran

• 1 ka manugbantala ang nagbakwit

• 2 ka balay ang may daku nga guba

• 5 ka balay ang may gamay nga guba

• Wala sang Kingdom Hall nga naguba ukon nawasak

• May 6 ka Disaster Relief Committee nga gin-asayn para magdumala sang pagbulig

• Ang mga manugtatap sang sirkito kag ang mga gulang nagahatag sang paumpaw halin sa Biblia kag sang praktikal nga bulig sa mga naapektuhan sang pagbaha

Padayon kita nga nagapangamuyo para sa mga naapektuhan sining grabe nga pagbaha sa madamo nga lugar. Nagasalig kita nga padayon sila nga hatagan ni Jehova sang paumpaw kag bulig.—Isaias 40:11.