Sang Hulyo 13 asta 17, 2021, halos wala untat ang mabaskog nga pag-ulan. Bangod sini, nag-awas ang mga suba sa Belgium, Germany, Luxembourg, kag sa Netherlands. Madamo ang napatay sa sini nga pagbaha. Wala pa mahibaluan kon daw ano gid kadaku ang kabilugan nga halit. Ini nga pagbaha isa sa pinakagrabe nga pagbaha nga naagyan sini nga mga pungsod sa sulod sang isa ka gatos ka tuig.

• Wala sang kauturan nga nasamaran sing malubha ukon napatay

• Indi magnubo sa 304 ka manugbantala ang nagbakwit

• Mga 100 ka balay ang nawasak gid

• Indi magnubo sa 242 ka balay ang may gamay nga guba

• 11 ka Kingdom Hall ang naguba

• 4 ka Disaster Relief Committee (DRC) ang naporma; 1 sa Belgium, 2 sa Germany kag Luxembourg, kag 1 sa Netherlands

• Subong, ginaorganisar sang DRC ang pagpaninlo kag pagkay-o sang naguba nga mga balay. Nalakip sa sini ang pagpamala sa mga balay kag paghak-ad sang mga lunang, kag subong man ang pagpangay-o sang mga guba

• Gin-organisar man sang DRC kag sang mga gulang ang temporaryo nga mga ilistaran kag ilimnon nga tubig sang mga nagbakwit

• Ang mga manugtatap sang sirkito sa sini nga mga lugar nagapalig-on sa mga kauturan kag nagahatag sing paumpaw paagi sa Biblia

• Padayon man ang mga miting sang kongregasyon paagi sa video conference. Ang mga miembro sang Branch Committee padayon man nga nagahatag sing paumpaw kag pagpalig-on sa mga kauturan nga nabahaan

• Ang tanan nga pagbulig ginhimo samtang ginasunod ang mga protocol nga ginapatuman bangod sa COVID-19

Sa Netherlands, ginbuligan sang mga gulang sang kongregasyon ang isa ka may edad na nga sister nga makabakwit. Sang ulihi, ginkontak sang mga kauturan ang iya bata nga lalaki, nga indi isa sa mga Saksi ni Jehova, para sugiran sia nga maayo ang sitwasyon sang iya iloy. Ining lalaki nagsiling sa iya iloy: “Kanami gid sang imo relihion. Wala ka gid nila ginpabay-an!”

Ginpanilagan sang isa ka bombero sa Belgium ang aton mga kauturan samtang nagabulig sila sa iban. Gindayaw gid sang bombero ang mga kauturan kay tanan sila nagasuksok sing insakto nga protective equipment kag organisado sila katama. Sa Germany naman, nagdayaw man ang isa ka grupo sang mga bombero sa mga kauturan naton kay ginatuman gid nila ang instruksion sang mga bombero. Ang isa ka bombero nagsiling: “Kon pareho lang tani sa inyo ang tanan nga mga boluntaryo sa pagbulig.”

Ang nabahaan nga mga kauturan nagapasalamat gid sa bulig nga ila nabaton halin sa organisasyon. Nagapasalamat man sila sa Nagadumala nga Hubon sa pagpalig-on sa katawhan ni Jehova nga mangin handa pirme para sa mga kalamidad. Kag siempre nagapasalamat sila kay Jehova, kay bangod sa iya, ang iya katawhan “magakabuhi nga luwas sa katalagman kag wala sing ginakahadlukan nga kalalat-an.”—Hulubaton 1:33.