Ang Oktubre 1, 2019 amo ang ika-100 nga anibersaryo sang magasin nga Magmata! Kada tuig, sobra 280 ka milyon ka kopya sini nga magasin ang ginabalhag sa 211 ka lenguahe. Nagapangaduha ini sa magasin nga Lalantawan nga amo ang may pinakamadamo nga translation kag kopya nga napanagtag sa bilog nga kalibutan.

Si Brother Samuel Herd, nga miembro sang Nagadumala nga Hubon, nagsiling: “Nabuligan sang magasin nga Magmata! ang madamo nga tawo nga mangin interesado sa Biblia, paagi sa sarisari nga mga topiko sini. Bisan pa nagbag-o na ang hitsura kag format sini nga magasin sa pagligad sang mga tinuig, epektibo gihapon ini sa aton pagbantala. Dalayawon gid nga 100 ka tuig na ini subong, kag ebidensia ini nga ginabuligan gid kita sang Dios paagi sa iya balaan nga espiritu.”

Una nga ginpahibalo sang mga Saksi ni Jehova ang pagpagua sini nga magasin sang Septiembre 1919 sa indi gid malipatan nga kombension sadto sa Cedar Point, Ohio, U.S.A, kag gintawag ini nga The Golden Age. Sang 1937, gin-islan ang ngalan sini sang Consolation para ipakita nga kinahanglan sang mga tawo ang paumpaw. Kag sang 1946, gin-islan liwat ang ngalan sini sang Magmata! para ipakita nga dapat maintiendihan sang mga bumalasa ang ginasiling sang Biblia parte sa nagakatabo sa kalibutan.

Nalipay gid kita nga nalab-ot naton ining importante nga hitabo samtang padayon naton nga ginagamit ang Magmata! sa aton pagtudlo sing Biblia, kag sa ‘pagpanaksi sing maid-id sa maayong balita.’—Binuhatan 20:24.