Ang Agosto 4, 2021, amo ang ika-75 nga anibersaryo sang “Glad Nations” Theocratic Assembly, ang una nga pinakadaku nga internasyonal nga kombension sang mga Saksi ni Jehova. Ini nga kombension ginhiwat sang Agosto 4-11, 1946, sa Cleveland, Ohio, U.S.A., sa Municipal Stadium kag sa tupad sini nga Municipal Auditorium.

Gin-organisar sang aton mga kauturan ini nga kombension pagkatapos gid sang World War II, ang inaway nga nagpaantos sa bilog nga kalibutan. Ini nga kombension tuhay gid sa inaway nga natabo, kay gintambungan ini sang linibo ka kauturan halin sa bilog nga kalibutan kag nagtipon sila sing mahidaiton. Malipayon gid nga nagaupdanay ang mga tawo nga sarisari ang rasa kag kahimtangan sa pangabuhi. Natabo ini sa tion nga ginaseparar sadto ang mga tawo nga itom kag puti sa madamo nga lugar sa United States.

Ang “Glad Nations” nga kombension amo ang una nga tion nga nagtipon ang 80,000 ka Saksi sa isa lang ka lugar. Nalipay gid ang aton mga kauturan nga makatipon liwat kay madugay sila nga wala makaupdanay bangod sang inaway. Gintambungan man ini sang 302 ka delegado halin sa 32 ka pungsod. Sang katapusan nga Domingo sang kombension, ginhatag ni Brother Nathan H. Knorr ang pamulongpulong nga “The Prince of Peace.”

Madinalag-on gid ini nga kombension pero madamo man sing kabudlayan. Sa una nga adlaw sang kombension, ginbudlayan ang mga nagaorganisar sini kay ang mga tawo nga nag-abot indi na makaigo sa Municipal Auditorium. Kinahanglan nila gamiton ang isa pa ka stadium sa tupad para sa sesyon sa gab-i nga masugod sa 7:45 p.m. Pero may duha ka baseball game nga nakaiskedyul sa sina nga stadium asta sa 6:30 p.m.

Sang ikaduha na nga game sang baseball, nag-inulan sing mabaskog amo nga temprano pa nagpalauli ang mga nagtan-aw sang game. Pero naghulaw ang ulan, kag tamatama lang nga nakaplastar sa stadium ang 50,000 ka Saksi antes magsugod ang sesyon sa gab-i.

Sa “Glad Nations” nga kombension ginpagua ang isa ka bag-o nga magasin nga Awake!, kag ang libro nga “Let God Be True” nga gamiton sa pagtuon sang Biblia. Ginpahibalo man ni Brother Knorr ang plano nga palaparon ang printery sa Brooklyn, New York, U.S.A., kag ang mga branch office sa anom ka pungsod.

Grabe gid ang kalipay sang mga kauturan sang 2,602 ang ginbawtismuhan—903 ka brother kag 1,699 ka sister—sa Lake Erie. May dugang pa nga espesyal nga mga bahin sa sini nga kombension pareho sang pag-demonstrate sang Pagtinuon sa Lalantawan kag Teokratikong Eskwelahan Para sa Ministeryo, kag pati man ang orkestra nga may 160 ka musician.

Ini nga kombension amo ang nangin sulundan sang nagsunod nga mga kombension. Halimbawa, sa sini nga kombension ginsugdan ang mga department pareho sang Attendant, Chairman’s Office, First Aid, Installation, kag Lost and Found.

Si Brother Ron Little, nga isa subong ka elder sa McKeesport Congregation sa Pennsylvania, U.S.A., 11 anyos pa lang sang nag-attend sia sa sini nga kombension upod sa iya tatay kag utod nga lalaki. Sa sulod sang walo ka adlaw nga kombension, sa trak ni Tatay niya sila nagtulog.

Madumduman gihapon ni Brother Little ang pagpagua sang magasin nga Awake!. “Sang ginpagua ang Awake!, tanan kami nagapakadto-pakari samtang ginauyatan namon ini,” siling niya. “Kon wala ka sing ginabitbit nga kopya, sigurado nga may mahatag gid sa imo.”

Si Brother Little, nga 86 anyos na subong, nagsiling man nga daw indi sia makapati sa kadamuon sang mga Saksi nga nagtipon didto. “Dumduman ko pa nga indi ko gusto nga matapos ini,” siling niya. “Nag-enjoy gid ako.”

Nagapasalamat gid kita nga ginapakamaayo ni Jehova ining aton “balaan nga mga pagtilipon.”—Levitico 23:2.