Sang 2020 nga tuig sang pag-alagad, madamo gid sang naagyan nga kabudlayan sa pag-alagad ang mga Saksi ni Jehova kag ang iban sini subong pa lang nila naeksperiensiahan. Pero bisan pa sini, determinado gihapon ang aton mga kauturan nga padayon nga magmatutom kay Jehova kag nahiusa.

Isa sa panguna nga mga rason sini nga mga kabudlayan amo ang COVID-19 nga pandemic, kag subong lang liwat naeksperiensiahan sang kalibutan ang amo sini kadaku nga problema.

Ang mga Saksi ni Jehova madasig nga nag-adjust sa sitwasyon nga resulta sang pandemic. Nakakita sila sing paagi para makatipon gihapon, makapalig-unay, kag makabantala sang maayong balita.

Ari ang pila sa “maayo nga balita” sa sining pinasahi nga tuig.—Hulubaton 15:30.

Sang nagligad nga tuig sang pag-alagad, ang aton organisasyon nagpagua sang kompleto ukon sang mga bahin sang Bag-ong Kalibutan nga Badbad sang Balaan nga Kasulatan sa 36 ka lenguahe. Bangod sa COVID-19, may mga restriksion nga ginpatuman, gani madamo sini nga mga Biblia ang ginpagua sa electronic format sini paagi sa mga videoconference. Ang kompleto ukon ang mga bahin sang Bag-ong Kalibutan nga Badbad matigayon na subong sa 193 ka lenguahe.

Sugod sang Marso 18, 2020, ang mga miembro sang Nagadumala nga Hubon may ginahatag nga espesyal nga mga video program kada bulan parte sa pandemic, sa jw.org kag sa JW Library nga app.

Sa una nga update, si Brother Stephen Lett nagsiling nga bisan pa makapa-stress gid ini nga pandemic, maathag nga ginapakita sini nga “nagakabuhi na kita sa katapusan nga bahin sang katapusan nga mga adlaw. Wala duhaduha, sa ulihi na gid nga bahin sang pinakakatapusan nga bahin!”

Bisan pa nagalala ang sitwasyon, si Brother Lett nagsiling nga “subong katawhan ni Jehova, wala kita ’ya naga-panic.”

Ang kada isa sa sini nga mga video update may makapalig-on nga mga report halin sa bilog nga kalibutan. Makita sa sini nga mga report nga maalamon gid ang pagtuman sa giya sang Nagadumala nga Hubon. Sa madamo nga lugar, gindayaw sang mga opisyal sang gobierno ang aton mga kauturan bangod sa ila madasig kag maalamon nga pag-atubang sa pandemic.

Sang nagligad nga mga tinuig, ang mga Saksi ni Jehova nagaupdanay gid kada tuig para dumdumon ang Panihapon sang Ginuo. Sini nga tuig, wala na gintugutan ang pagtipon sa madamo nga lugar. Bangod sini, naghimo sang ila kaugalingon nga emblema para sa Memoryal ang mga pamilya kag mga indibiduwal, kag nagtan-aw sila sang pamulongpulong sa Memoryal paagi sa videoconference.

Pero may mga lugar nga indi posible nga mag-videoconference. Amo sina ang sitwasyon sa 11 ka branch sa Africa. Gani gin-organisar nila nga ma-broadcast ang Memoryal sa mga estasyon sang TV kag radyo. Bangod sini, sobra 407,000 ka manugbantala ang nakapamati sa programa, wala pa labot sa wala maisip nga mga interesado.

Gin-aprobahan sang Nagadumala nga Hubon ang pila ka branch nga i-broadcast sa TV kag radyo ang mga miting sang kongregasyon pareho sa ginhimo sa Memoryal. Sa sini nga paagi, ang mga kauturan sa pigado nga mga lugar, makapamati sa mga miting sang kongregasyon kada semana paagi sa TV kag sa radyo. Subong, 23 ka branch ang nagahimo sini, pati ang mga lugar sa Africa, Europe, North America, kag South America.

Bangod sa COVID-19 nga pandemic, mabudlay para sa madamo ang pagtigayon sang ila panguna nga mga kinahanglanon. Gani, sobra 400 ka Disaster Relief Committee ang gin-organisar sa bilog nga kalibutan para buligan ang mga kauturan nga indi na masarangan nga suportahan sang ila kongregasyon. Sang nagligad nga 2020 nga tuig sang pag-alagad, gin-aprobahan sang Nagadumala nga Hubon nga gamiton ang sobra $18 ka milyon para mahatagan sing bulig ang sobra 330,000 ka manugbantala nga apektado sang COVID-19.

Sa una nga tion, gintan-aw sang mga kauturan ang programa sang rehiyonal nga kombension sa ila mga balay, paagi sa Internet. Ang mga pamulongpulong sa sining ginrekord nga programa ginhatag sang mga miembro sang Nagadumala nga Hubon kag sang ila mga kabulig. Ini nga mga video gin-translate sa sobra 500 ka lenguahe. Matigayon ini sa jw.org kag sa JW Library nga app para matan-aw ini sang mga kauturan kag mga interesado sa ila mga balay.

Indi lang pandemic ang ginaatubang sang mga kauturan sa iban nga lugar, kundi pati man ang mapintas nga paghingabot.

Sang nagligad nga tuig, ginatos ka balay sang mga Saksi ang ilegal nga gin-raid sa Russia, kag ang iban sa ila gin-aresto pa. Subong, 42 ka kauturan ang ginpriso sa Russia, kag 2 sa Crimea. Sugod sang nagdesisyon ang Supreme Court sang Russia sang 2017, sobra 1,000 na ka balay sang aton mga kauturan ang gin-raid.

Ang may pinakamadamo nga Saksi nga ginpriso amo ang Eritrea, kay subong 52 ang ara sa prisuhan. Lakip sa ila sanday Paulos Eyasu, Isaac Mogos, kag Negede Teklemariam, nga ginpriso halin sang Septiembre 17, 1994, kay indi sila magsoldado bangod sa ila konsiensia. Dugang pa, 26 sini nga mga kauturan ang sobra pulo ka tuig na sa prisuhan.

Padayon naton nga ginapangamuyo nga magpabilin nga maisog ang tanan naton nga mga kauturan nga ginpriso. Kabalo kita nga mangin matutom sila samtang ginabatas nila ang mga pagtilaw.—Bugna 2:10.

Sang nagligad nga tuig sang pag-alagad, ginpamatud-an sang mga Saksi sa bilog nga kalibutan ang ila pagkamainunungon kay Jehova. Padayon sila nga nagabantala sa sarisari nga paagi, nagapangita sing bag-o nga mga paagi para makapalig-unay, kag nagatuman sa direksion sang Nagadumala nga Hubon kag sang gobierno.

Sa tanan nga ginahimo nila, ginpakita sang aton mga kauturan nga palangga nila ang ila Manunuga. Kag ang ila pagkamainunungon subong makabulig sa ila nga mabatas ang mas mabudlay pa gid nga mga pagtilaw sa palaabuton.—Santiago 1:2, 3.