Ang graduation sang ika-148 nga klase sang Watchtower Bible School of Gilead wala sing kinalain sa tanan nga graduation antes sini. Pero pinasahi ini nga graduation bangod wala sang mga tumalambong sa awditoryum. Ang tanan nga tumalambong nag-tie in sa sini nga programa paagi sa livestream. Sa sining tion nga may nagalapta nga balatian sa bilog nga kalibutan, ining Gilead Graduation isa sa mga halimbawa kon paano naga-adjust ang organisasyon sa nagabag-o nga mga sitwasyon.

Ang programa ginhiwat sang Marso 14, 2020, sa educational center sang mga Saksi ni Jehova sa Patterson, New York. Si Brother Stephen Lett, miembro sang Nagadumala nga Hubon, ang tsirman sang programa. May kadamuon nga 55 ka estudyante ang nag-graduate. *

Pila ka semana antes sang graduation, nangin headline sang mga balita sa bilog nga kalibutan ang paglapta sang COVID-19. Subong sang nareport na sa Newsroom nga seksion sang jw.org, gina-monitor sang world headquarters sang mga Saksi ni Jehova ang sitwasyon kag ginahatagan sang direksion ang tanan nga kongregasyon base sa rekomendasyon sang mga awtoridad.

Isa sa sini nga mga rekomendasyon amo nga indi na maghiwat sang dalagku nga mga pagtilipon. Bangod sini kag sa iban pa nga mga rason, ang Nagadumala nga Hubon nagdesisyon nga wala sang mga bisita nga magatambong sa sini nga graduation. Wala man sang magatambong sa awditoryum. Ang pamilya Bethel kag ang mga estudyante sang Gilead nangin maayo gid nga halimbawa sa pagtuman sini nga direksion.—Juan 13:34, 35.

Pero natan-aw ini sang mga bisita sang mga estudyante sang Gilead kag sang pamilya Bethel paagi sa livestream. Sa sini man nga paagi, sobra 10,000 ka kauturan sa bilog nga kalibutan, pati ang mga abyan kag pamilya sang mga nag-graduate, ang nakatan-aw sini nga programa.

Gusto gid sang Nagadumala nga Hubon nga ang espirituwal nga mga okasyon, ilabi na gid ang mga miting sang kongregasyon kada semana, padayon nga mangin regular nga bahin sang aton pagsimba bisan pa may pandemic sang COVID-19. Bangod sini, ang Nagadumala nga Hubon naghatag sang espesipiko nga direksion sa mga branch sa bilog nga kalibutan kon paano i-adjust ang mga miting sang kongregasyon base sa lokal nga mga sitwasyon. Sa pila ka lugar, mahimo nga ang mga kauturan kinahanglan magtipon sa mas magagmay nga mga grupo ukon “magtipon” paagi sa videoconference. Nagasalig kita nga ang mga kauturan sa bilog nga kalibutan padayon nga makabenepisyo sa mga instruksion ukon pagpalig-on nga ginapadala sa tanan nga kongregasyon.

Maathag nga wala gid sing makapugong sa gahom ni Jehova sa pagbulig sa aton bilang isa ka organisasyon nga maatubang ang bisan ano nga kabudlayan.—Salmo 18:29.