Ginapaabot nga ipahibalo sang Yalta City Court sang Republic of Crimea ang desisyon sini sa kaso ni Brother Artem Gerasimov sa Marso 3, 2020. Gusto sang piskal nga prisuhon sing anom ka tuig kag tunga si Brother Gerasimov bangod sang iya relihioso nga mga pagpati.

Temporaryo nga ginpriso kag gin-interogar si Brother Gerasimov sang Marso 20, 2019, pagkatapos gin-raid sang mga Federal Security Service (FSB) agent ang walo ka balay sang mga Saksi ni Jehova sa mga siudad sang Alupka kag Yalta sa Crimea. Ginpanguha sang mga FSB agent ang mga kompyuter, gadyet, kag mga Biblia. Dayon, ginkasuhan sang mga imbestigador si Artem Gerasimov nga nagaorganisar sang extremist nga hilikuton bangod lamang nagatipon sia upod sa iban kag nagaistorya parte sa Biblia.

Nagasalig gid kita nga padayon nga hatagan ni Jehova ang aton mga kauturan sing “kaisog kag kusog” samtang ginabatas nila ang mga paghingabot sa ila pagtuo.—Salmo 138:3.