Sa nagligad nga lima ka tuig, na-enjoy sang mga Saksi ni Jehova sa bilog nga kalibutan ang espirituwal nga programa kada bulan sa JW Broadcasting. Samtang ginakalangkagan na naton ang mga programa sa 2020 nga tuig sang pag-alagad kag sa magaabot pa nga mga tinuig, binagbinaga ang maayo nga mga butang nga nahimo sugod sang una ini nga gin-broadcast sang Oktubre 2014.

Gin-translate sa 185 ka lenguahe. Sang primero, English lamang ang lenguahe sang mga programa. Dayon, sang Mayo 2015, gin-aprobahan sang Nagadumala nga Hubon nga i-translate ini sa sobra 40 ka lenguahe. Subong, pagligad lang sang apat ka tuig, gina-translate na ini sa aberids nga mga 185 ka lenguahe.

Para sa bilog nga kalibutan. Ini nga broadcast gindesinyo para sa mga kauturan sa bilog nga kalibutan, gani mas nagadamo ang mga video segment nga ginhanda sang mga video team halin sa sarisari nga bahin sang kalibutan. Sa masami, ginatapos ang programa paagi sa video sang isa ka kongregasyon halin sa malayo nga mga lugar pareho sang Ethiopia, Iceland, Mongolia, Saipan, Tuvalu, kag Uganda. Ang mga programa sa JW Broadcasting ginatan-aw sa 230 ka pungsod, pati sa malayo nga mga lugar sa Antartika pareho sang Heard Island kag McDonald Islands, diin wala sing permanente nga nagaistar. Sa aberids, may ara ini mga 8.6 ka milyon ka views ukon download kada bulan sa tapos nga mapagua ang isa ka bag-o nga broadcast.

Madamo kag sarisari nga content. Sobra 60 ka oras sang orihinal nga content ang napagua, lakip ang mga pamulongpulong, interbyu, eksperiensia, balita, kag pagdramadrama. Sugod sang ginpagua ang una nga orihinal nga kanta nga The Best Life Ever, nangin regular nga feature sang programa ang music video. Ini nga mga kanta gina-translate sa 368 ka lenguahe.

Mga host. Sang umpisa, mga miembro lamang sang Nagadumala nga Hubon ang naga-host sa programa. Pero subong, naga-host naman ang mga kabulig sang mga komite sang Nagadumala nga Hubon. Sa kabilugan, 29 na ka brother ang nangin host ukon co-host sa mga programa.

Manami nga mga komento. Ang isa ka brother sa United States, nga nagaantos bangod na-stroke sia, nanamian gid sa mga orihinal nga kanta. Nagsiling sia: “Nabuligan ako sang matahom kag makapalig-on nga mga kanta nga mangin positibo para maatubang ko ang bag-o nga mga pagtilaw sa akon kabuhi. Nagdayaw gid ako sa mahimo sang musika para mapauswag ko ang akon mga kinaiya bilang Cristiano. Salamat gid sa sini nga aman!”

Pagkatapos matan-aw ang Nobiembre 2016 nga programa, ang isa ka pamilya sa United States nga napatyan sang bata bangod sa kanser, nagsiling: “Naghibi kami sang ginatan-aw ang music video nga Just Around the Corner. Daw kami ang mga ginikanan sa video nga ara sa paraiso. Kon pamatyag ko daw indi ko na masarangan, ginapabatyag gid ni Jehova nga naintiendihan niya kami kag buligan niya kami. Ini nga video sabat gid ni Jehova sa amon mga pangamuyo.”

Isa ka mag-asawa sa Ukraine ang nagpasalamat gid sa mga programa kada bulan. Nagsiling sila: “Bangod sa JW Broadcasting, daw kapamilya na namon ang mga miembro sang Nagadumala nga Hubon!”

Nagapasalamat kita kay Jehova sa sining aman nga sibu gid sa tion, nga padayon nga nagapahiusa sa iya katawhan sa bilog nga kalibutan.—1 Pedro 2:17.