Ang aton bata pa nga mga kauturan sa bilog nga kalibutan nagapangita gid sing ideya nga makapanaksi kag mapalig-on ang iban nga kauturan sa sining tion sang coronavirus nga pandemic.

Sa New Zealand, ang mga tawo nagabutang sang mga hampanganan, teddy bear, kag mga piktyur sa ila mga bintana para makita ini sang gaagi nga mga bata. Napensaran sang mga bata sa sarisari nga kongregasyon didto nga puede man nila ini sundon para makapanaksi. Gani nag-obra sila sang mga piktyur ni Caleb kag ni Sophia kag ginbutangan ini sing “Matan-aw mo kami sa jw.org.”

Ang siam ka tuig nga si Emilia nga taga-Switzerland may maluya nga immune system. Pero ginasulatan niya ang mga nagaistar sa isa ka nursing home nga indi puede bisitahan bangod sang pandemic. Sa iya sulat, ginabutang ni Emilia ang iya drowing parte kay Noe kag sa arka. Ginapaathag niya nga si Noe kag ang iya pamilya sadto na-isolate man, pero bangod sini naluwas sila. Ginpalig-on niya ang mga nagaistar sa nursing home nga “indi maggua, pareho kay Noe.” Kon matapos na ang pandemic, gusto ni Emilia nga kadtuan ang mga nagaistar sa nursing home.

Nangin positibo gid ang resulta sang mga sulat ni Emilia. May mga nagbalos sa iya sulat kag ginsulatan niya sila liwat. Nakalab-ot sa isa ka reporter ang ginhimo ni Emilia gani nabalita ini sa newspaper.

Sanday Peyton Kempf kag Ella Kempf, duha ka bata nga sister nga nagaistar sa Ontario, sa Canada, padayon nga nagapakig-istorya sa mga kauturan sa ila kongregasyon bisan pa may pandemic. Ang ila tatay nga si Jared nagsiling: “Sa amon family worship, nagabulig ang mga bata sa paglista sang tanan nga gusto namon istoryahon.” Ang ila nanay nga si Jessica nagsiling: “Gusto namon sila tudluan nga importante gid nga ipabatyag sa aton mga kauturan kag sa amon pamilya kag mga abyan nga wala gid namon sila ginakalimtan.”

Sa Colorado, U.S.A., amo man sini ang ginahimo sang siam ka tuig nga si Stella kag sang iya nanay. Naghimo sila sang listahan sang ngalan sang tanan nga tigulang sa ila kongregasyon kag isaisa ini nga gintawgan.

Ang mag-utod nga si Jonathan McKampson, nga 12 anyos, kag si Sean McKampson, nga 15 anyos, ara sa Chinese nga kongregasyon sa Arizona upod sa ila ginikanan. Para makapadayon sila sa pagbantala, nagahimo sila sang mga sulat sa Chinese kada aga antes sila mag-eskwela. Bangod nagatuon pa lang sila sang Chinese, madugay nila matapos ang mga sulat. Pero determinado gid sila nga masugid ang mensahe sang Biblia sa mga tawo nga nagahambal sang Chinese.

Anom ka bata, nga nagaedad sing 2 asta 15, ang pirme nagakadto sa isa ka nursing home sa nakatundan sang Michigan upod sa ila nanay kag sa isa ka payunir nga sister. Pero, bangod sang coronavirus nga pandemic, indi na sila puede magkadto sa nursing home. Gani ang mga bata nagkanta sang mga Kingdom song kag nagbasa sang mga teksto halin sa Biblia samtang ginarekord ini sang ila mga ginikanan para ipadala sa nursing home. Ang isa sa mga nagaobra sa nursing home nagsugid sa tatay nga may ginaatipan sila didto nga na-depress pagkatapos maglantaw sang balita parte sa mga napatay bangod sang coronavirus. Pero nagkalma ini sang nakita niya ang video sang mga bata.

Kabalo kita nga nalipay gid si Jehova sa mga panikasog sini nga mga bata nga mapakita ang ila gugma sa mga tawo kag madayaw Sia paagi sa pagpangita sing mga ideya para makapanaksi.—Salmo 148:12, 13.