Madamo nga kongregasyon ang nagagamit sing mga kompyuter kag Internet para makahiwat sang ila mga miting sa sining tion sang pandemic. Pero ang pila naton ka mga kauturan nga nagaistar sa malayo nga mga lugar wala sing Internet. Gani grabe gid ang ila panikasog para padayon sila nga makahiwat sang mga miting. Ginahimo nila ini samtang ginasunod ang mga safety protocol nga ginapatuman bangod sa COVID-19. Ari ang pila sa ginahimo sang mga kauturan sa Africa.

Madamo nga kauturan ang wala sing Internet, gani indi sila makagamit sang Zoom. Kada semana, ang branch sa Malawi nagapadala sang video sang mga miting sa mga gulang sang tanan nga kongregasyon kag gina-download ini sang mga gulang sa ila mga cell phone. Dayon ginapasa ini sang mga gulang sa mga kauturan sa kongregasyon.

Pero mabudlay ini para sa 28 ka kauturan sa Tcharo Congregation nga ara sa kabukiran sa naaminhan sang Malawi malapit sa Lake Malawi. Bangod bukid na katama ang ila lugar, wala sang signal sang cell phone didto. Gani ang isa ka gulang nagalakat sing pila ka kilometro para makakita sang signal kag ma-download ang video. Dayon, mabalik sia kag kadtuan niya ang mga balay sang mga kauturan para ipasa ang video paagi sa Bluetooth.

Sining karon lang, nalipay ang mga gulang kay nadiskobrehan nila nga mas makusog ang signal sa Lake Malawi kag lapit lang ini sa ila mga balay. Nagasakay sila sa gamay nga baruto pakadto sa tunga sang linaw diin may signal para mag-download sang video. Bangod sini, indi na ayawan lakat ang mga gulang kag mas madasig ini nga paagi.

Para “maduaw” ang mga kongregasyon sa aminhan-nakatundan sang Mozambique, ang mga manugtatap sang sirkito sa sini nga mga lugar nagapamulongpulong gamit ang mga cell phone. Bangod indi pirme posible nga mag-conference call, sa masami ang mga manugtatap sang sirkito may madamo nga cell phone kag ginabutang nila ini sa ila atubangan. Paagi sini nga mga cell phone, ginatawgan nila ang kada pamilya kag dayon nagapamulongpulong sila.

Ang iban naman nga kauturan wala gid sing signal kay puerte kalayo sang ila ginaistaran. Kon iskedyul sang miting, ini nga mga utod nagalakat sa kagulangan para mangita sing signal. Kon makakita na sila sing signal, mapungko na sila kag mamati sa programa.

Si Brother Yohane Vinho, nga manugtatap sang sirkito sa sini nga lugar, nagsiling nga “grabe gid ang sakripisyo sang kauturan para makabenepisyo sila sa mga miting.” Gani, mabakod gihapon ang ila kaangtanan kay Jehova bisan pa indi nila kaupod ang iban nga kauturan. Ang isa pa ka manugtatap sang sirkito nga si Brother Carlos Cortazão, nagsiling: “Pamatyag namon daw upod lang namon ang mga kauturan sa Kingdom Hall. Mabatian namon ang komento sang kada isa kag ululupod kami nga nagakanta. Nakita namon nga ginabuligan gid ni Jehova ang iya katawhan para padayon sila nga makabaton sang espirituwal nga pagkaon nga kinahanglan gid nila sa sining tion sang pandemic.”—Juan 21:17.