Sang 2021 nga tuig sang pag-alagad, ang mga Pioneer Service School sa bilog nga kalibutan ginhiwat paagi sa videoconference bangod sa pandemic. First time ini nga natabo. Nagapasalamat gid ang mga estudyante sa sini nga pagpakamaayo halin sa organisasyon ni Jehova, gani gintinguhaan gid nila nga maka-attend sa sini. Talupangda ang pila sa ila eksperiensia. Makita mo kon paano sila ginbuligan ni Jehova sa ila mga problema para makaeskwela sila sa PSS.

Si Sister Mieko Yoshinari nga taga-Japan, 30 ka tuig na nga regular payunir. (Tan-awa ang piktyur sa ibabaw.) Nabudlayan sia maggamit sing mga gadyet kag buron na ang iya panan-aw. Pero, determinado gid sia nga mag-eskwela sa PSS paagi sa videoconference. Nagsiling sia: “Ginhandaan ko gid ang akon mga komento. Ginasulat ko sing dalagku ang akon na-research para mahapos ko ini mabasa. Ginpalig-on ako kag ginpabakod ni Jehova sa sini nga pioneer school.”

Si Sister Anita Kariuki, nagaistar sa Thika nga isa ka banwa malapit sa Nairobi, Kenya. Para masuportahan ang iya pagpayunir, nagaobra sia bilang isa ka beautician. Pero para makaeskwela sia sa PSS, kinahanglan niya isira sing isa ka semana ang iya parlor. Sang primero, nagakabalaka si Anita sa sini, pero nagsalig sia nga buligan sia ni Jehova. Nagsiling sia: “Nangamuyo ako kay Jehova nga buligan niya ako, kag ginpadayon ko lang ang akon ministeryo.” Sang weekend antes sang iya klase, may natipon na sia nga kuarta para sa iya galastuhan pero kulang ini gihapon sing $30 (U.S.). Bisan pa sini, nag-eskwela sia gihapon sa PSS. Pagkatapos sang iya klase sang Mierkoles, may nagtawag nga kostumer kay mabayad sang iya utang. Ang iya ginbayad insaktuhan gid sa kinahanglan ni Anita.

Ang balay ni Sister Laurenth Madrigales sa Yoro, Honduras, ginbahaan kag napuno sing tatlo ka pie nga lunang bangod sa Bagyo Eta kag Bagyo Iota. Halos naubos gid ang pagkabutang sang ila pamilya kag nagbakwit sila. Amo man ini ang tion nga gin-imbitar si Laurenth nga mag-eskwela sa PSS. Excited gid sia mag-eskwela, pero nagakabalaka sia kay basi indi matapos sang ila pamilya ang pagtinlo sang ila balay antes magsugod ang klase. Si Laurenth nagsiling: “Pila man ka adlaw nga aga pa kami nagasugod sa pagpaninlo kag gab-i na kami makatapos. Kapoy na gid ako. Daw wala na ako sing kusog para magtuon kag maghanda para sa PSS, gani ginsilingan ko ang mga utod nga indi na ako mag-eskwela.” Ginpangamuyo niya kay Jehova nga nasubuan gid sia bangod sa iya sitwasyon. Nakibot gid sia nga pila ka adlaw antes sang iya klase, ang Disaster Relief Committee nagsiling nga mabulig sila sa pagtinlo sang ila balay. Bangod sini, may tion na sia nga magtuon kag maghanda, gani nakaeskwela sia sa PSS sa ila balay.

Si Brother Spencer Stash kag ang iya asawa nga si Alexandra, mga regular payunir sa Cleveland, Ohio, United States. Antes sang ila klase, naospital ang iya amay nga si Robert nga isa na ka balo. Nagaduhaduha ang mag-asawa kon bala maeskwela pa sila. Ginpalig-on sila ni Robert nga mag-eskwela sila. Pero, duha ka adlaw antes sang ila klase napatay sia. Nasubuan gid sila sa natabo. Pero bisan pa sini, sa una nga adlaw lang sang klase sila naka-absent. Pirme gid sila nagapangamuyo kag amo ini ang nakabulig sa ila nga mangin mabakod. Si Spencer nagsiling nga matawhay ang iya panghunahuna kay kabalo sia nga ginsunod nila ang gusto sang iya amay. Nagsiling pa sia: “Gusto na gid namon sia liwat makita kag sugiran sia nga nakaeskwela kami sa PSS kag sang amon mga natun-an. Ginpalig-on gid kami sang amon mga klasmeyt kag sang amon mga instruktor. Nakabulig gid ini sa amon.”

Si Brother Jung Dae-sik nga taga-South Korea, pulo ka tuig na nga nagaistar sa nursing home. Na-stroke sia kag naparalisar ang pihak niya nga lawas, gani naga-wheelchair na lang sia subong. Nag-eskwela sia nagligad, pero bangod may ginabatyag sia, isa lang gid ka adlaw ang iya matapos. Sang gin-agda sia nga mag-PSS paagi sa videoconference, nalipay gid sia. Nagsiling sia: “Sang gin-imbitar ako nga mag-eskwela, naghibi gid ako sa kalipay. Nagapasalamat gid ako sa sini. Kay kon indi paagi sa sini, daw wala na gid ako sing tsansa nga makaeskwela sa PSS.” Nagsiling pa sia: “Nalipay gid ako nga nakaeskwela ako sa PSS.”

Si Brother Eddy El Bayeh kag ang iya asawa nga si Cherise, nagaistar sa New South Wales, Australia. Si Cherise nagsiling: “Pamatyag ko, daw wala na ako nagauswag sa akon ministeryo. Pirme gihapon ako nagaministeryo, galing indi na gid ako pareho kapisan sang una.” Nakabulig gid sa iya ang PSS nga bag-uhon ang iya pagtamod. “Natun-an ko kon ano pa ang dapat ko pauswagon kag ang mga puede ko himuon bisan pa limitado ang akon mahimo.”

Ginsugid ni Eddy kon paano sia napalig-on sang PSS: “Pamatyag ko, daw ang Soberano mismo ang naghakos sa akon, dayon ginpikpik niya ako kag nagsiling: ‘Padayon lang kay updan ta ka. Palangga ta ka kag importante ka sa akon.’”

May naiskedyul na nga mga klase sa masunod nga mga binulan. Kanami gid nga mabal-an nga padayon nga ginatudluan ni Jehova ang iya katawhan bisan ano man ang matabo sa kalibutan. Nagapahanumdom ini sa aton sang ginsiling ni Job: “Ginpakataas ang Dios sa iya gahom; sin-o ang manunudlo kaangay sa iya?”—Job 36:22.

Makita sa mga piktyur sa ubos ang mga instruktor kag mga estudyante halin sa lainlain nga pungsod nga nakabenepisyo man sa pioneer school nga ginhiwat paagi sa videoconference.