Sang Marso 5, 2023, gin-release ni Brother David Splane, miembro sang Nagadumala nga Hubon, ang Bag-ong Kalibutan nga Badbad Sang Cristianong Griegong Kasulatan sa South African Sign Language (ginatawag nga SASL sa South Africa) kag ang libro sang Mateo sa Ndonga. Gin-release ni Brother Splane ini nga Biblia sa isa ka espesyal nga programa nga ginhiwat sa branch sa South Africa. Madamo nga kongregasyon ang nag-connect sa programa paagi sa live streaming. Sobra 130,000 ang kabilugan nga nag-attend sa sini nga programa. Puede na dayon ma-download ang digital nga mga kopya sini nga translation pagkatapos sang sini nga release.

Ang pag-translate sa SASL nagsugod sang 2007 sa branch office malapit sa Johannesburg, South Africa. Sang 2022, ang translation team nagsaylo sa remote translation office sa Durban. Parte sa bag-o lang nga pag-release sang Biblia sa SASL, si Brother Ayanda Mdabe, nga isa ka apa nga gulang nagsiling: “Bangod sini nga translation, mas maintiendihan pa gid sang mga apa nga ang Biblia matuod kag gamhanan. Makabulig sa akon ining Biblia sa SASL nga mas maintiendihan pa gid ang personalidad ni Jesus kag ang mga prinsipio sa Biblia. Gani, ginabag-o sini ang akon hunahuna.

Ang kalabanan nga nagahambal sang Ndonga ara sa Namibia, kag ang Ndonga nga remote translation office ara sa Ondangwa. a Ang isa sa mga translator nagsiling: “Ang pag-release sini nga Biblia nagpahanumdom sa akon nga palangga gid ni Jehova ang mga tawo kag gusto niya nga makabaton sila sang sibu nga ihibalo parte sa iya.”

Nagakalipay kita upod sa aton mga kauturan nga makabenepisyo gid sa sini nga mga release. Ining sibu nga translation magabulig sa ila nga pakabahandion ang mga sugo ni Jehova.—Hulubaton 2:1.