DISIEMBRE 30, 2019
BALITA SA BILOG NGA KALIBUTAN
Nag-organisar sing Bulig ang mga Saksi ni Jehova Pagkatapos sang Bagyo Idai
Pagkatapos nga ginwaswasan sang Bagyo Idai ang bagatnan-sidlangan nga baybayon sang Africa sang Marso 2019, gilayon nga nag-organisar ang mga branch sa Malawi, Mozambique, kag Zimbabwe sang 14 ka Disaster Relief Committee (DRC) para mabuligan ang mga Saksi nga naapektuhan. Sa sining tatlo ka pungsod, napatindog ukon nakay-o na ang sobra 650 sa 1,434 ka naguba nga mga balay sang aton mga kauturan. Sa 29 ka naguba nga mga Kingdom Hall, 8 na ang napatindog kag 10 ang nakay-o na.
Sang nagligad nga siam ka bulan, sobra 3,500 ka kauturan ang nagboluntaryo para magbulig. Ang iban sa ila halin sa malayo pa nga mga lugar. Halin sila sa mga pungsod sang Africa pati na sa Brazil, France, Italy, kag United States. Gintudluan sang hanas nga mga boluntaryo ang lokal nga mga kauturan kon paano mag-obra sa konstruksion pareho sang pagkantero kag pagpamanday.
Mga miembro sang construction group sa Malawi nga nagapapiktyur sa atubangan sang balay nga ginapatindog nila
Sa Mozambique, pagkatapos maigo sang Bagyo Idai ang mga probinsia sang Manica kag Sofala, halos 70 porsiento sang pananom sang aton mga kauturan ang napierde. Sa pagdumala sang branch, ang DRC sa sina nga lugar nagpanghatag sang mga 430 ka tonelada nga pagkaon. Ang ginpanghatag nila nga pagkaon amo ang naandan sang mga kauturan. Lakip sa sini ang mga harina sang mais, beans, mantika, asin, kag kalamay. Nanghatag man sila sing lima ka tonelada nga binhi sang kamatis, mais, kag humay.
Ginabulubanta sang branch sa Malawi nga ining gin-organisar nga pagbulig matapos sa Pebrero 2020 kag sa Enero 2020 naman sa Mozambique. Samtang ang sa Zimbabwe natapos na sang Septiembre 2019. Ginabulubanta nga 4 ka milyon ka dolyar (U.S.) ang magasto sa sini nga mga pagbulig.
Si Trent Edson, nga miembro sang Komite sang Sanga sa Zimbabwe kag nagaalagad sa Disaster Relief Desk, nagsiling: “Grabe gid ang kalipay sang mga kauturan kay napatindugan na sila sang balay. Kanami makita nga nagaulikid gid ang mga kauturan diri kag bisan sa iban nga pungsod. Madamo gid ang gusto magbulig.”
Upod sa sobra 10,000 ka kauturan nga naapektuhan sini nga bagyo sa bagatnan-sidlangan sang Africa, ginapasalamatan naton si Jehova sa gugma sang mga kauturan sa “tion sang kalisdanan.”—Hulubaton 17:17.
Ginpatindog sang mga boluntaryo ang balay ni Brother Welosi Mbendera kag sang iya asawa nga si Sister Esinala Mbendera, nga halin sa Nkolong’onjo Congregation sa Malawi
Si Brother Nehemiah Tigere kag ang iya asawa nga si Sister Fatima Sengami Tigere sa atubang sang ila bag-o nga balay sa Zimbabwe
Si Brother Witness Jabu kag Brother Augustine Kamadzi, nga nagaalagad bilang mga manugtatap sang sirkito, nga naga-shepherding sa isa ka Saksi nga pamilya nga naguba ang balay sa Nchalo, Malawi
Mga brother sa relief center sa Chimoio nga nagadiskarga sang sinako nga mais para ipanghatag sa mga kauturan sa Mozambique
Mga brother nga matabok sa Shire River paagi sa bangka para idul-ong ang mga suplay sa mga kauturan nga nagaistar malapit sa dulunan sang Mozambique
Mga kauturan nga nagahakot sang mga suplay nga nabaton nila halin sa mga kauturan sa Malawi pakadto sa Kingdom Hall sa Tengani Village, Mozambique
Mga kauturan sa Kingdom Hall sa Tengani Village, Mozambique, nga nagabaton sang mga suplay
Basi Manamian Ka Man
NEWS RELEASE
Ginwaswasan sang Bagyo Idai ang Southeast Africa
MGA PIRME GINAPAMANGKOT
Diin Ginagamit sang mga Saksi ni Jehova ang mga Donasyon?
Ginagamit bala ini sang mga Saksi para magmanggaranon sila?