Sang Septiembre 1, 2022, eksayted nga ginsugdan liwat sang mga Saksi ni Jehova sa bilog nga kalibutan ang pagpamalaybalay nga pagbantala, nga amo gid ang panguna nila nga hilikuton. Dungan sa sini, may pinasahi man nga kampanya sa pagsugod sang pagtuon sa Biblia sini nga bulan. Para sa iban nga mga kauturan, pagbalik ini sa ila naandan kag nanamian nga porma sang ministeryo. Para naman sa pila ka kauturan, first time sila nga magakadto sa ila mga kaingod para isugid ang mensahe sang Biblia. Ari ang pila ka eksperiensia halin sa bilog nga kalibutan nga nagapakita kon daw ano ka makalilipay ang pagsugod sang aton 2023 nga tuig sang pag-alagad.

Sang Septiembre 2, 2022, ang duha ka sister nga si Nicole kag si Tina, sa Petershagen sa North Rhine-Westphalia, nagbantala sa isa ka bilding pero wala sing tawo ang mga apartment. Sang nagapagua na sila, nabatian nila ang isa ka bataon nga babayi nga nagapanawag sa ila. Nagsiling ang babayi nga wala niya dayon mabuksan ang puertahan sang nanuktok ang mga sister kag ginsilingan niya sila nga magbalik para makaistoryahanay sila parte sa Biblia. Sang makasulod sila sa apartment sang babayi, nakita nila ang kopya sang New World Translation of the Holy Scriptures sa lamesa kag bal-anon gid nga pirme ini ginabasa. Nagsiling ang babayi nga nabaton niya ini nga Biblia sang ato pa sia sa Italy tatlo na ka tuig ang nagligad. Sang nag-pandemic, nagsaylo sia sa Germany kag wala na sia makaistorya sa mga Saksi ni Jehova. Nagbayluhanay sila sing impormasyon para makakontakanay kag gin-agda sang mga sister ang babayi nga mag-attend sa mga miting. Pagligad sang duha ka adlaw, nag-attend sa miting ang babayi upod sa iya duha ka bata. May gin-asayn naman nga mag-Bible study sa sini nga babayi.

Si Manuel kag si Karol Gastelum, nga mga espesyal payunir sa teritoryo nga nagahambal sang Mam nga lenguahe, ginpasulod sang isa ka mabuot nga babayi sa iya balay. Wala niya mahibaluan nga may ngalan ang Dios, gani ginbinagbinag nila ang leksion 04 nga “Sin-o ang Dios” sa Magkabuhi sing Wala Katapusan! nga libro. Sang ginbasa nila ang Isaias 42:8, nakibot ang babayi sang makita niya ang ngalan sang Dios, nga si Jehova, sa iya mismo Biblia.

Naghibi ang babayi kag nagsiling sia nga bisan may Biblia na sia, naintiendihan na niya subong nga kinahanglan niya tun-an kon ano ang ginasiling sini para matuman niya ang sugo sang Dios. Sang matapos nila ang leksion, nagpasalamat gid ang babayi sa iya natun-an. Nagsiling sia nga isugid man niya ini sa iya bana. Ang mag-asawa nga Gastelum naghimo sing iskedyul nga padayunon ang pag-istoryahanay parte sa Biblia upod sini nga babayi.

Samtang nagabantala sa Yokohama, si Brother kag si Sister Nukamori nagpanawag sa isa ka balay nga may intercom. Sang nagsabat ang babayi nga tagbalay, nagpakilala sila kag nagsiling nga mga Saksi ni Jehova sila. Nagsiling ang tagbalay nga maghulat lang anay sa puertahan. Dugaydugay, ginbuksan sang babayi ang puertahan kag nagsiling, “Dugay na ’ko nga nagahulat nga kadtuan sang mga Saksi ni Jehova.”

Nagsiling ang babayi nga nakasugod na sia Bible study upod sa mga Saksi ni Jehova sa Nagasaki. Nagsaylo sia sa Yokohama sang nag-pandemic pero ginpadayon niya ang iya pagtuon paagi sa Zoom. Sina nga semana, ginsilingan sia sang naga-Bible study sa iya: “May kampanya sa Septiembre. Sigurado nga may isa sa mga Saksi ni Jehova nga makadto dira sa imo. Hambala sia nga mapa-study ka sa iya sing face-to-face.” Nalipay gid ini nga babayi nga nakadtuan sia dayon sang mga Saksi. Nagsiling sia nga gusto niya mag-attend sa mga miting kag may iskedyul na sila para mag-Bible study.

Sang gintanyagan sang mag-asawa ang isa ka babayi nga mag-Bible study, nagsiling sia nga pila ka tuig ang nagligad nakatuon na sia upod sa mga Saksi ni Jehova kag naka-attend pa gani sa mga miting. Pero nauntat ini, kag nahuya sia mangita sang mga Saksi kay wala niya ginasunod ang ginatudlo sang Biblia. Dayon naghibi sia. Ginbasa sa iya sang mag-asawa ang Salmo 10:17 kag ginpaathag sa iya nga wala sia ginkalimtan ni Jehova. Ginkomendahan nila sia kay gusto niya sundon ang mga sugo ni Jehova. Nagpasugot sia nga magpa-Bible study kag nagsiling nga ang iya 16 anyos nga bata nga lalaki gusto man magtuon sa Biblia.

Sang masunod nga adlaw, nagbalik ang mag-asawa kag nagahulat na ang babayi kag ang iya bata. Pagkatapos nila matun-an ang leksion 01 sang Magkabuhi sing Wala Katapusan! nga brosyur, gin-imbitar sila sang mag-asawa nga mag-attend sa miting sina nga weekend, kag nag-attend sila. Gusto gid sini nga babayi kag sang iya bata nga padayunon ang ila pagtuon kag pag-attend sa mga miting.

Nangamuyo si Ramon nga tani may masugiran sia sang maayong balita sa iya una nga adlaw sa pagpamalaybalay liwat. Sang nagpanawag sia sa una nga balay, may babayi nga naglili sa puertahan. Nagpanamyaw si Ramon kag nagpakilala. Antes pa makasugod si Ramon sa iya presentasyon, ang babayi nagsiling: “Kon bal-an mo lang, madugay ko na ginahulat ini nga tion. Pirme ko ginapangamuyo nga makadto kamo diri sa balay.”

Ginpaathag sang babayi nga naistorya sia sang mga Saksi pila ka tuig ang nagligad kag naka-attend na sia gani sa isa ka miting sang kongregasyon. Pero nagsaylo sia, kag wala na sia sing kontak sa mga Saksi. Ginsilingan sia ni Ramon nga gin-untat anay ang aton pagpamalaybalay bangod sang pandemic. Dayon ginbasa ni Ramon ang Salmo 37:29 sa iya kag ginsilingan sia nga puede sia maka-Bible study. Nagpasugot ang babayi, kag may gin-istorya si Ramon nga sister nga amo ang maga-study sa sini nga babayi.

Bangod sini nga eksperiensia, si Ramon nagsiling: “Bal-an ko nga ginagiyahan kita ni Jehova kag sang mga anghel para maistorya naton ang mga tawo nga gusto mamati.”

Samtang nagapanawag sa isa ka balay sa Kentucky, natalupangdan ni Katelyn Thompson nga may teksto nga nakasulat sa mailbox kag may gamay nga sign nga nagasiling “Jesus Loves You” sa ugsaran. Sang nagpanuktok si Katelyn sa puertahan, may babayi nga nagbukas. Nagpakilala si Katelyn, kag nagsiling nga bangod sang COVID-19 nga pandemic wala makadtuan sang mga Saksi ni Jehova ang ila mga kaingod. Pero ginsugiran niya ang babayi nga bisan may pandemic, ang mga Saksi nagahimo sang sulat kag nagapanawag sa telepono para palig-unon kag paumpawan ang iban. Dayon ginkamusta niya ang babayi kag ang pamilya sini. Nagsiling ang babayi nga napatay ang iya tatay sang pandemic. “Nakabaton ako sang mga sulat halin sa inyo,” siling niya, “kag nagapati ako nga ginahatag sang Dios kon ano ang kinahanglan ko sina nga tion!” Ginsilingan ni Katelyn ang babayi nga nagabuylog sia sa kalisod sini kag dayon ginbinagbinag nila ang leksion 02 sang Magkabuhi sing Wala Katapusan! nga brosyur. Ginbasa nila ang mga teksto sa leksion, kag nagpokus sa paglaum nga pagkabanhaw sa palaabuton. Naghibi ang babayi. Kag nagsiling sia nga sina mismo nga adlaw, isa na ka tuig nga napatay ang iya tatay. Ginhatag sang babayi ang iya impormasyon kay Katelyn para makakontakanay sila kag nagpasugot sia nga kadtuan liwat. Nakabaton man sang text si Katelyn halin sa babayi nga nagasiling: “Salamat gid, kinahanglan ko gid nga may magpabakod sa akon subong nga adlaw!”

Sigurado gid nga ginapakamaayo ni Jehova ang aton pagbalik sa pamalaybalay nga pagbantala kag ang aton kampanya nga makasugod sang pagtuon sa Biblia. Eksayted kita nga mabal-an ang resulta sini!—Juan 4:35.