Sugod sang Abril 1, 2022, nagbalik na sa face-to-face nga miting ang mga Saksi ni Jehova. Sang primero, mahimo nga daw namag-o kag nabalaka ang mga kauturan. Pero nabuslan ini dayon sang pagkinadlaw, mga luha bangod sa kalipay, kag sang mapagsik nga pagkanta sang mga Kingdom song.

Para sa iban, amo ini ang first time nga nakakadto sila sa Kingdom Hall.

“Amo ini ang akon una nga face-to-face nga miting sa Kingdom Hall,” siling ni Brother Krzysztof Hoszowski nga taga-Poland. “Nag-Bible study ako paagi sa videoconference, kag sang ginbawtismuhan ako gin-stream lang ini paagi sa Zoom. Bal-an ko man kon ano ang ginahimo sa face-to-face nga mga miting, kay damo na ako sang natan-aw nga mga video parte sa sini. Nalipay gid ako kay nabatyagan ko ang pagpalangga, kalipay, kag kaayo sang mga kauturan sa miting.”

Sang maglapta ang COVID-19 sa bilog nga kalibutan sang Marso 2020, ginsugdan sang mga Saksi ni Jehova ang pagmiting paagi sa videoconference. Ang mga indi pa maka-attend sa face-to-face nga miting, puede gihapon maka-attend paagi videoconference.

“Sang magtokar na ang music kag sang nagkanta na ako sang una nga kanta, grabe gid ang akon kalipay kag nagpasalamat gid ako kay updanay na kami liwat sang akon mga kauturan pagkatapos sang duha ka tuig,” siling ni Brother Neil Campbell nga taga-Edinburgh, Scotland.

Nagapasalamat kita kay Jehova nga ginpakamaayo niya ang aton pagbalik sa face-to-face nga miting.—Salmo 84:10.