Ginhatagan sang $1 million (U.S.) sang New York State Energy Research and Development Authority (NYSERDA) ang mga Saksi ni Jehova bilang bahin sang Buildings of Excellence Competition. Ini nga award para sa mga bilding sa Ramapo kay ang desinyo sini indi makahalit sa mga tanom kag mga sapat sa sini nga lugar. a Amo ini ang una nga bes nga may nabaton nga award ang isa ka building project sa banwa sang Ramapo ukon sa Rockland County.

Si Keith Cady, nga nagaalagad sa Construction Project Committee, nagsiling: “Sang gindesinyo namon ang complex sang Ramapo, ang amon goal amo ang maghimo sang mga bilding nga wala nagausik sang enerhiya ukon wala nagahigko sang palibot. Nalipay gid kami nga nakita sang gobierno ang amon pagpanikasog kag ginhatagan kami sini nga award bisan wala pa magsugod ang konstruksion. Gamiton gid namon sing maayo ini nga kuarta lakip man ang boluntaryo nga mga donasyon sang mga Saksi ni Jehova.”

Magluwas sa Buildings of Excellence Competition, wala na sang iban nga kompetisyon nga pareho sini sa bilog nga United States. Nagsugod ini sang Marso 2019 kag nakahatag na ini sang award sa 63 ka project. Suno sa opisyal nga website sang NYSERDA, ang mga project nga nakabaton sang award “nagapahulag sa industriya nga sundon ang ila halimbawa para ang carbon dioxide nga ginapagua naton indi magsobra sangsa masarangan i-absorb sang duta.”

Nalipay kita sa sini nga pagkilala sang mga awtoridad kag sa pagdayaw nga ginadala sini sa ngalan ni Jehova.—Mateo 5:16.