SEPTIEMBRE 22, 2023
BALITA SA BILOG NGA KALIBUTAN
Nalipay ang mga Tawo sa Northern nga mga Lugar sang Canada kag United States sang Nabatian Nila ang Parte sa Ginharian sang Dios
Si Brother Mark Sanderson nga nagahatag sang pamulongpulong sa dedikasyon sa Iqaluit, Nunavut
Sang Mayo 20, 2023, ginhatag ni Brother Mark Sanderson, miembro sang Nagadumala nga Hubon, ang pamulongpulong sa dedikasyon sang bag-o nga Kingdom Hall sa Iqaluit, Nunavut, Canada. May ara 44 ka tawo nga nag-attend sing face-to-face sa programa, kag 388 ang nag-tie in paagi sa videoconference. Ang Nunavut isa sa mga lugar sa bilog nga kalibutan nga diutay lang ang nagaistar. Halos 40,000 lang ang nagaistar sa lugar nga mga 1,837,000 kilometros kuadrado ang kalaparon. Gin-report na sang nagligad sa jw.org nga madamo nga kabudlayan ang gin-atubang sang aton mga kauturan para matukod ini nga Kingdom Hall. Ang mga Saksi nga una nga nagbantala sang maayong balita sa sining malayo nga teritoryo nakaatubang sang matugnaw nga tiempo kag mabudlay nga mga alagyan. Ginhatagan sang atension ang ginhimo nga pagbantala sining determinado kag matutom nga mga Saksi sa programa sang dedikasyon.
Mga 40 porsiento sang kalaparon sang pungsod ang sakop sang northern territories sang Canada kag lakip diri ang Nunavut, ang Northwest Territories, kag Yukon
Sang 1976, nagsaylo si Sister Margaret Gallie halin sa Montreal, Quebec, pakadto sa lugar nga ginatawag subong nga Iqaluit, Nunavut. Ang iya ginbiyahe may kalayuon nga 2,052 ka kilometro. Sia ang una nga Saksi nga nagbantala sa sining malapad kag halos wala sing pananom nga lugar. Sang ulihi sina nga tuig, si Brother Hans Pintar, nga manugtatap sang sirkito sadto, kag ang iya asawa nga si Minerva, naghimo sang isa ka semana nga espesyal nga pagbisita kay Sister Gallie para palig-unon sia kag updan sa ministeryo.
Dayon sang 1983, may gamay nga grupo sang mapisan nga mga Saksi nga nagkadto sa Iqaluit. Nagpanikasog gid sila para mabantala ang kamatuoran diri kag nagresulta ini sa pagbawtismo sa isa ka pamilya nga amo ang nangin una nga mga Saksi sa sini nga lugar. Sa masunod nga 20 ka tuig, madamo nga beses nga nagbiyahe sa sining malayo nga lugar ang mapisan nga mga manugbantala sang Ginharian para isugid ang maayong balita sa iban. Sang 2008, naporma ang isa ka group sa Iqaluit. Sang 2010, ining gamay nga group nangin kongregasyon kag ginahiwat nila ang ila mga miting sa gymnasium sang eskwelahan. Sang Oktubre 2022, nalipay gid ang mga kauturan sang nagsaylo sila sa ila bag-o ginpatindog nga Kingdom Hall.
Madamo nga tuig nga ginabatas sang mga kauturan nga handa magsakripisyo ang mabudlay nga sitwasyon sa pinakamalayo nga teritoryo sa north sang Canada
Luwas sa Iqaluit, nagbantala man ang mga special pioneer upod ang iban pa nga kauturan sa sarisari nga malayo nga lugar sa bilog nga Nunavut. Lakip sa ila si Brother Joel Therrien kag ang iya asawa nga si Cheryl. Nagsaylo sila sa Baker Lake, nga mga 1,329 ka kilometro sa west sang Iqaluit. Si Brother Therrien nagsiling: “Bisan pa sa matugnaw nga tiempo, sa gasto, kag napahilayo kami sa kauturan, nalipay gid kami sa ginhimo namon nga mga sakripisyo. Mabatyagan namon ang pagpakamaayo ni Jehova bangod sa makalilipay nga pagbaton sa amon sang mga tawo didto sa Baker Lake. Nagapasalamat gid kami nga nakapakigbahin kami sa pagsugid sang mensahe sang Biblia sa mga tawo nga nagaistar didto.”
Si Brother Joel Therrien kag si Brother Joseph Utatnaq nga naga-attend sa “Mangin Mapinasensiahon”! nga Rehiyonal nga Kombension sa Winnipeg, Canada, sang Agosto 25, 2023
Si Joseph Utatnaq isa ka residente sang Baker Lake. Nalipay gid sia sang nabatian niya ang maayong balita sang Ginharian gani nagpa-Bible study sia kay Brother Therrien kag nabawtismuhan sang 2021. Si Brother Utatnaq amo lang subong ang manugbantala nga nagaistar sa Baker Lake. Sang nabal-an niya nga hiwaton sa Mayo 2023 ang programa sang dedikasyon sang Kingdom Hall sa Iqaluit, nagpaninguha gid sia nga maka-attend. Amo ato ang una nga tion nga nakita niya sing face-to-face ang mga kauturan sa Kingdom Hall halin sang nabawtismuhan sia. Sia nagsiling: “Nagdayaw gid ako sang nakita ko ang natapos na nga Kingdom Hall. Madamo sa nagbulig nga mapatindog ang hall ang indi taga-diri kag wala sila maanad sa tiempo kag sitwasyon diri. Maathag gid nga ginhimo nila ini bangod sa ila gugma kay Jehova kag sa ila isigkatawo.”
Subong, may ara 178 ka kauturan sa apat ka kongregasyon sa mga teritoryo sa north, lakip ang isa ka kongregasyon sa Nunavut, duha sa mga teritoryo sa Northwest, kag isa sa Yukon. Halos 40 porsiento sang kadutaan sa Canada ang sakop sini nga mga teritoryo. Bisan pa sobra katugnaw kag mabudlay ang sitwasyon sa mga lugar sa north sang Canada kag mabudlay malab-ot ang mga tawo nga nagaistar sa sining malayo nga mga lugar, nagadayaw kita sa pagpangabudlay sang aton mga kauturan nga naghatag sang ila tion kag kusog para mabantala ang maayong balita sa sining malayo nga mga lugar.—Binuhatan 1:8.
MALAYO NGA MGA TERITORYO SANG ALASKA, U.S.A.
Sa ibabaw sa tuo: Ang Kingdom Hall sa Haines, Alaska. Sa ubos sa tuo: Ang kongregasyon sa Haines nagatipon sa ila bag-o nga Kingdom Hall
Ang Alaska amo ang pinakamalapad kag pinakamalayo nga state sa north sang United States. May kalaparon ini nga 1,723,000 kilometros kuadrado, nga duha ka beses nga mas daku sangsa state sang Texas. Mga 730,000 ka tawo ang nagaistar sa Alaska. Una nga nakalab-ot ang maayong balita sang Ginharian sa Alaska sang mga 1897, kag subong may ara na mga 2,400 ka manugbantala sang Ginharian nga nagaalagad sa 30 ka kongregasyon kag 8 ka group. Sa pinakadaku nga siudad sang Alaska nga Anchorage, may pulo ka kongregasyon kag lima ka group nga nagahambal sang sarisari nga mga lenguahe, lakip ang Hmong (White), Korean, Russian, Samoan, kag Central Alaskan Yupik, nga isa ka nitibo nga lenguahe. Ang iban nga mga siudad pareho sang Fairbanks, Juneau, kag Wasilla, may ara man sang mga kongregasyon kag mga group sa sarisari nga lenguahe. Dugang pa, ginabantala man ang maayong balita sa malayo nga mga lugar pareho sang gagmay nga mga banwa sang Bethel, Wrangell, kag Haines.
Si Brother Kenneth Cook, Jr., nga nagahatag sang pamulongpulong sa dedikasyon sa Haines, Alaska
Sang Agosto 2014, ang duha ka special pioneer, nga sanday Brother Sebabi Leballo kag Brother Dustin Watson, gin-imbitahan nga magsaylo sa Haines, nga mga 825 ka kilometro sa southeast sang Anchorage. Pagligad sang isa ka tuig, nagahiwat na sila sang 40 ka Bible study sa mga interesado sa sini nga lugar. Ang pila ka mga estudyante nagpabawtismo sang ulihi. Sang 2018, may gintukod nga isa ka gamay nga kongregasyon sa Haines kag ang mga miting ginahiwat sa isa ka library sa sini nga lugar. Sang 2021, may ginbakal nga bilding kag ginhimo ini nga isa ka Kingdom Hall. Wala magdugay, sang Septiembre 2022, ginhatag ni Brother Kenneth Cook, Jr., miembro sang Nagadumala nga Hubon, ang pamulongpulong sa dedikasyon sa 48 nga nag-attend. May 86 man nga nag-tie in paagi sa videoconference. Subong, ining kongregasyon may 21 ka manugbantala nga nagasugid sang maayong balita sa Haines kag sa iban pa nga malayo nga mga lugar.
Si Brother Dustin Watson (sa wala) kag si Brother Sebabi Leballo (sa tuo) sang nag-abot sila sa Haines, Alaska, sang 2014
Sa tapos maka-attend sa dedikasyon sang Kingdom Hall sa Haines sang 2022, si Brother Leballo nagsiling: “Sang nag-abot ako walo ka tuig ang nagligad, daw indi mapatihan nga may maporma nga kongregasyon kag matukod diri ang isa ka Kingdom Hall subong. Makapalig-on gid nga makita nga bisan sa malayo nga mga lugar, ginapaposible gid ni Jehova nga ang ‘tanan nga sahi sang tawo’ makatuon parte sa iya.”—1 Timoteo 2:4.
