Sang Domingo, Hulyo 26, 1931, si Brother Joseph F. Rutherford, presidente anay sang Watch Tower Bible and Tract Society, nagpamulongpulong sa isa ka kombension sa Columbus, Ohio, U.S.A., nga gintambungan sang sobra 15,000 ka tawo. Gin-broadcast ang pila ka bahin sang programa sa sobra 450 ka estasyon sang radyo sa bilog nga pungsod. Amo ina ang una nga tion nga ang isa ka programa sa radyo gin-broadcast sa madamo nga estasyon sa bilog nga kalibutan. Ginpresentar man ni Brother Rutherford ang isa ka resolusyon nga may tig-ulo “Isa ka Bag-o nga Ngalan.” Ini nga resolusyon nagasiling: “Sugod subong, gusto naton nga makilala kita kag tawgon sa ngalan nga mga Saksi ni Jehova.” (Tan-awa ang kahon nga “ Ang Resolusyon.”) Nag-ugyon sa sini ang tumalambong kag nagsinggit sing “Huo!” kag dayon naglanog ang bilog nga tilipunan sang nagpamalakpak sila.

Si Brother Arthur Worsley, nagsiling: “Indi ko gid malipatan ang matunog nga pagsinggit kag paglanog sang tilipunan bangod sa pagpamalakpak.” Ang istorya sang kabuhi ni Brother Arthur, ginpagua sang 1986.

Nabatian sang iban sa sarisari nga pungsod ang pagbasa sang resolusyon bangod gin-broadcast ini sa radyo. Si Brother kag si Sister Barber sa Australia, nagsiling: “Sang nabatian sang mga kauturan sa Melbourne ang pagpamalakpak sang mga tumalambong sa America, nagtindog man sila kag nagpinalakpak.” Sa Japan, nabatian sang gamay nga grupo ang resolusyon kag lakip sa ila si Sister Matsue Ishii. Nagsiling sia: “Nagsinggit kami sing malipayon upod sa mga kauturan sa America.”

Ang pila ka tawo nagsiling nga ang mga poster nga ginbutang sang mga negosyante para abiabihon ang International Bible Student sa Columbus, Ohio diin ginhiwat ang kombension, gin-islan sang mga negosyante sing mga poster nga nagasiling, “Welcome, Jehovah’s Witnesses.” Ang The Messenger, isa ka newspaper nga ginhimo sang Watch Tower Bible and Tract Society kag amo ini ang nagreport sang pila ka detalye parte sa kombension. Sang Hulyo 28, 1931, gingamit sini nga newspaper ang ngalan nga mga Saksi ni Jehova. Amo ini ang una nga tion nga mabasa ina nga ngalan sa naimprinta nga publikasyon.

Wala magdugay pagkatapos sina nga kombension, may ginhimo nga isa ka preaching campaign kag ginhimo ini sa madamo nga lenguahe. Ginpanagtag nila ang bukleta nga The Kingdom, the Hope of the World. Mabasa sa sini nga bukleta ang resolusyon parte sa bag-o nga ngalan. Pagligad sang duha ka bulan kag tunga, sobra lima ka milyon ka kopya ang napanagtag, kag madamo nga lider sang relihion, mga nagatrabaho sa gobierno, kag mga negosyante ang nakabaton sini nga bukleta.

Nadumduman ni Brother Martin Poetzinger ang natabo sadto nga tion. Nagsiling sia: “Sa kada balay nga makadtuan namon, nagakakibot gid ang mga tawo kon magsiling kami nga ‘Ari kami subong bangod isa kami sa mga Saksi ni Jehova.’ Sa masami nagalungolungo ang mga tawo ukon indi gani mamangkot sila: ‘Pero indi bala mga estudyante sa Biblia kamo gihapon?’” (Tan-awa ang kahon nga “ Calling Card nga Nagapakilala sa Ngalan ni Jehova.”) Pero pagligad sang mga tinuig, nagsulat si Brother Poetzinger: “Kilala na gid kita! Antes pa ako makahambal, ang mga tawo nagasiling na: ‘Sigurado nga isa ka gid sa mga Saksi ni Jehova.’”

Isa man si Brother A. H. Macmillan sa mga tumalambong sa kombension sang 1931. Sang ulihi, ginpaathag niya kon ngaa nagakaigo gid ang bag-o nga ngalan. Nagsiling sia: “Para sa akon kanami gid sini nga ideya kay kon mabatian pa lang sang mga tawo ina nga ngalan mabal-an na nila kon ano ang aton ginahimo kag kon ano ang aton gusto himuon. Antes sini ginatawag kita nga mga Estudyante sang Biblia. Ngaa? Kay mga estudyante gid man kita sang Biblia. Kag sang nagtuon sing Biblia ang mga tawo sa lainlain nga pungsod upod sa aton, gintawag kita nga International Bible Students. Pero subong mga saksi kita ni Jehova nga Dios, kag ina nga ngalan nagasugid sa mga tawo kon sin-o kita kag kon ano ang aton mga hilikuton.”

Subong, ginapabugal gid sang minilyon ka tawo sa bilog nga kalibutan nga tawgon nga mga Saksi ni Jehova.—Isaias 43:10-12.