MAYO 3, 2022
BALITA SA BILOG NGA KALIBUTAN
“Padayon nga Pabakura ang Inyo Relasyon kay Jehova”
Espesyal nga Programa nga Nagpabakod sa mga Kauturan sa Ukraine kag Poland
Sang Abril 26, 2022, si Brother Mark Sanderson, miembro sang Nagadumala nga Hubon sang mga Saksi ni Jehova, nag-abot sa Poland para palig-unon ang mga kauturan nga naapektuhan sang padayon nga inaway sa Ukraine.
Mga kauturan sa Assembly Hall sa Poland nga nagabulig para mangin madinalag-on ang programa
Ang tanan nga kongregasyon sa Poland kag Ukraine, gin-imbitar nga mag-attend sa isa ka espesyal nga programa sang Abril 30, 2022. Sa Poland naman, ang mga refugee halin sa Ukraine kag ang tanan nga nagabulig sa disaster relief work gin-imbitar man nga mag-attend sing personal sa Assembly Hall sa Warsaw. Mga 250,000 ang nag-attend sa sini sa Poland kag Ukraine lakip ang mga nag-attend paagi sa videoconference.
“Ginapensar gid kamo sang mga kauturan sa bilog nga kalibutan kag ginalakip gid nila kamo sa ila mga pangamuyo,” siling ni Brother Sanderson. “Sa world headquarters, adlaw-adlaw gid nga ginalakip sa pangamuyo ang mga kauturan sa Russia kag sa Ukraine, kag ginalakip man sila sa mga pangamuyo kon magmiting ang Nagadumala nga Hubon.” Ginpasalig niya ang mga tumalambong nga “kon makaeksperiensia kamo sang mga kabudlayan, indi buot silingon nga wala na nalipay si Jehova sa inyo. Nakita niya kamo, palangga niya kamo, kag malapit sia ilabi na sa mga ginabudlayan gid.”
Isa ka grupo sang nagbakwit nga mga kauturan halin sa Mariupol, Ukraine, nga nagatan-aw sang espesyal nga programa
Si Brother Sanderson nagsiling pa gid: “Padayon nga pabakura ang inyo relasyon kay Jehova. Ang aton goal indi lang nga malampuwasan ang mga kabudlayan. Kundi gusto ta nga magbakod pa gid ang aton pagtuo kag mangin mas malapit kay Jehova bangod sa mga kabudlayan nga aton naagyan. Amo sina ang ginatudlo ni Jehova sa aton.”
Si Serhiy, nga isa ka elder sa Odessa, Ukraine, nagsiling: “Sang nagligad nga mga semana, indi ako makatulog sing maayo bangod sa kabalaka, kasubo, kag kahadlok. Pero, [ang espesyal nga programa] nagpabakod sang akon pagtuo nga importante gid para kay Jehova indi lang ang iya katawhan kundi ang kada isa sa aton.”
Si Tatiana, nga isa ka refugee nga sister halin sa Kyiv, Ukraine, nagsiling: “Subong, nabatyagan ko gid nga daw ara si Jehova sa tupad ko. Ginahakos niya ako kag nabatyagan ko gid ang iya pagpalangga. Bisan diin man kita, upod naton pirme si Jehova.”
Palangga gid naton ang aton mga kauturan. Kag kabalo kita nga ining espesyal nga programa nagpahanumdom sa ila sang “mainunungon nga gugma” ni Jehova sa iya katawhan.—Salmo 136:1.
