Ang aton mga kauturan sa madamo nga pungsod padayon nga naga-adjust sang ila mga pamaagi sa pagbantala kag pagsimba bangod sang coronavirus nga pandemic. Madamo nga kongregasyon ang indi na makatipon sa mga Kingdom Hall, gani ang mga miting ginahiwat na subong paagi sa videoconference. Bangod sini, ginbag-o man sang madamo ang ila paagi sang pagsuporta sa bug-os kalibutan nga pagbantala nga hilikuton. Nagahatag sila subong sang donasyon paagi sa internet ukon online.

Ang mga Saksi ni Jehova sa sobra 112 ka kadutaan puede magkadto sa donate.pr418.com para makahatag sang donasyon paagi sa debit ukon credit card.

Indi na posible sa kalabanan nga mga kauturan nga maghatag sang donasyon sa ila Kingdom Hall, gani ang pila nagdesisyon nga mag-set up sang sigesige nga donasyon sa donate.pr418.com. Si Sister Susan Cohen, isa ka 74 anyos nga manugbantala sa United States, nagahatag sang donasyon sa sini nga paagi. Siling niya: “Hapos lang gid ini himuon. Kon nahimo ko, mahimo man ini sang iban. Nalipay gid ako kay makahatag ako gihapon sang donasyon para sa bug-os kalibutan nga pagbantala nga hilikuton.”

Si Brother Eduardo Paiva nga taga-Brazil naghunahuna sadto nga ang donate.pr418.com para lang sa mga indi makahatag sang donasyon sing personal. Siling niya: “Pero sang sini lang, narealisar ko nga amo ini ang pinakamaayo nga paagi para masuportahan ang bug-os kalibutan nga hilikuton sa tion sang emerhensia kag krisis. Magamit naton ini para padayon naton nga mapakita ang aton pagpasalamat kag gugma sa sining katapusan nga mga adlaw.”

Si Brother Gajus Glockentin, nga nagadumala sang Treasurer’s Office sa world headquarters sang mga Saksi ni Jehova sa Warwick, New York, nagsiling: “Makapalig-on gid nga makita nga gusto gid suportahan sang mga kauturan ang mga ginahimo sang Ginharian. Ginapasalamatan gid ining mga donasyon. Pirme namon ginarebyu ang aton mga hilikuton sa bilog nga kalibutan para makita kon diin puede makakinot kag magamit sing pinakamaayo ang mga donasyon. Bangod sang kahimtangan, dapat buhinan sang iban ang ila ginadonar. Pero ang ila kahanda nga suportahan ang organisasyon ni Jehova wala gid nabuhinan.”—2 Corinto 9:7.