Sa una nga tion sa halos tatlo ka tuig, ginbalik ang face-to-face nga mga sirkito nga asembleya sa bilog nga kalibutan sang Enero 2023. Sa amo man nga tion, ginbalik ang face-to-face nga teokratiko nga mga eskwelahan sa madamo nga pungsod. Makita gid ang pagpakamaayo ni Jehova sa sining espesyal nga mga okasyon kag programa.

Sa Villahermosa, Tabasco State, Mexico, mga 200 ka manugbantala ang nagbuligay sa pagtinlo sang Assembly Hall antes sang sirkito nga asembleya. Ang iban nagbiyahe pa sing anom ka oras para lang makalab-ot didto. Ang isa ka sister nagsiling: “Madugay na nga wala kami makakita nga nagtipon ang madamo nga mga kauturan. Kanugon kon indi namon paghingalitan ini nga tsansa para magbulig.”

Sa isa ka sirkito nga asembleya sa Crownsville, Maryland, U.S.A., ang isa ka sister nagsiling: “Grabe gid ang akon kalipay. Wala untat ang akon paghibi halin sang pag-abot ko diri. Naubos ko na ang akon tisyu bisan wala pa nakasugod ang programa. Indi ko gid pag-ibaylo ini nga asembleya sa bisan ano sa kalibutan.”

Nalipay gid ang mga estudyante sa madamo nga branch nga mag-attend sa face-to-face nga klase sang School for Kingdom Evangelizers kag sa School for Circuit Overseers and Their Wives. Si Brother Giovanny Cabezas, nga instruktor sa isa ka eskwelahan sa Palm Coast, Florida, U.S.A., nagsiling: “Excited gid ako sang nabatian ko nga magabalik na ang face-to-face nga teokratiko nga mga eskwelahan. Manami gid ini nga lugar para sa mga instruktor, mga estudyante, kag mga volunteer nga nakapokus gid sa paghimo sang kabubut-on ni Jehova.”

Si sister Satoko Nakata naka-attend sa School for Circuit Overseers and Their Wives upod sa iya bana sang Enero 2023. Sia nagsiling: “Kanami kay ang mga miting kag ang pioneer service school ginhimo paagi sa Zoom sa tion sang pandemic. Pero, kabudlay kay indi mo maistorya sing maayo ang iban kag indi mo man mabatian ang ila kadlaw ukon kanta. Isa gid ka mapinalanggaon nga regalo halin kay Jehova nga maka-attend sa sining face-to-face nga klase. Nagaistoryahanay kami, nagakadlawanay, kag kon kaisa nagahibi-anay, ukon nagakanta sing malipayon upod sang akon mga klasmeyt. Nagapasalamat gid ako sa kay Jehova kag sa Nagadumala nga Hubon.”

Sigurado nga nalipay gid si Jehova nga makita ang iya mga alagad nga nagatipon para simbahon sia kag magbaton sang iya instruksion. Masiling man naton ang ginsiling ni Hari David: “Dayawon ko ikaw sa daku nga kongregasyon; Dayawon ko ikaw sa madamo nga katawhan.”—Salmo 35:18.