Delikado katama kon malatnan ang mga tigulang sang coronavirus, gani ang aton tigulang nga mga kauturan maalamon gid nga nagatuman sa rekomendasyon sang mga health official nga indi maggua sa ila balay. Pero bisan amo sina ang ila sitwasyon, masako sila gihapon. Ginagamit nila ang sarisari nga mga teknolohiya para makapakigbahin sa mga miting kag sa ministeryo.

Sa Rome, Italy, ang isa ka 94 anyos nga sister, nga nabawtismuhan sang 1952, indi na makagua sa iya balay antes pa sang pandemic. Bisan pa nga ginatan-aw niya ang mga miting sa JW Stream, madugay na nga wala niya nakita ang mga miting sang iya kaugalingon nga kongregasyon. Pero subong nga ginahiwat na ang mga miting sang iya kongregasyon paagi sa videoconference, makita na niya ang tanan nga kauturan sa iya kongregasyon kag mabatian sila.

Sa Spanish Fork, Utah, U.S.A., si Sister Stephanie Aitken, nga isa ka apa, nagaistar sa isa ka nursing home. Pero bangod sa coronavirus, wala na nagabaton ang pasilidad sang mga bisita. Gani ginbuligan sia sang isa ka gulang kag sang asawa sini nga ma-set up ang isa ka videoconference app sa iya gadyet. Ginhimo nila ini paagi sa pagpalapit sa kristal nga puertahan sang pasilidad kag pagsenyas sa iya sang instruksion. Sang ma-install na ni Sister Aitken ang app, ginhakos niya ang iya gadyet. Nalipay gid sia nga makakonek na sia sa iya kongregasyon.

Ginagamit sang aton mga kauturan, pati sang mga tigulang, ang teknolohiya bilang pag-adjust sa mabudlay nga kahimtangan nga resulta sang pandemic. Ginapahanumdom sini sa aton ang promisa ni Jehova nga gamiton sing maalamon sang iya katawhan “ang gatas sang mga pungsod.” (Isaias 60:16) Kabalo kita nga masarangan ni Jehova nga ihatag ang tanan nga kinahanglanon sang iya mga alagad sa duta sa tion sang kabudlayan.