Sugod sang Agosto 31 asta Oktubre 26, 2019, ang mga kauturan halin sa 19 ka pungsod nag-upod sa kampanya nga pagtudlo sa Biblia sa lenguahe nga Arabic sa Austria kag Germany. Sa sini nga kampanya, ang 1,782 ka boluntaryo nakahinguyang sing 40,724 ka oras sa pagtudlo, nakapatan-aw sang mga video sing 4,483 ka beses, kag nakahatag sang 24,769 ka literatura nga base sa Biblia.

Sang nagligad nga mga tinuig, sobra isa ka milyon ka refugee ang nagsaylo sa Austria kag Germany, kag ang kalabanan sa ila halin sa mga pungsod nga nagahambal sang Arabic. Madamo sa sini nga mga refugee ang wala pa gid nakabati sang makapaumpaw nga mensahe sang Biblia. Ginsuportahan sang mga kauturan halin sa Canada, United States, kag iban pa nga pungsod sa Europe ang 1,108 ka manugbantala sa Austria kag Germany nga nagaalagad sa Arabic nga teritoryo. Ginkadtuan nila ang 24 ka rehiyon, lakip ang dalagku nga mga siudad pareho sang Berlin, Cologne, Dresden, Frankfurt, Graz, Hamburg, kag Vienna.

Ang isa ka brother didto nagsiling: “Wala gid namon ginpaabot nga mapalig-on gid kami sa sini nga kampanya. Napabakod gid kami sang mga kauturan nga nagbulig, kag nagapasalamat gid kami sa ila. Ginapasalamatan man namon ang pribilehiyo nga makaupod sa sining pinasahi nga kampanya.”

Pagkatapos makatambong sa miting sang mga Saksi ni Jehova ang isa ka lalaki nga Arabic, ginpalapitan niya ang isa ka brother kag ginpamangkot: “Bal-an mo kon ano ang buot silingon sang mahabba sa German?”

Ang brother nagsabat, “Liebe (gugma)!”

“Insakto,” siling sang lalaki, “kag amo gid sina ang nakita ko sa sini nga miting subong! Mabuot gid kamo sa akon. Ang tanan nagbugno gid kag nangamusta sa akon. Sarisari ang pungsod nga ginhalinan ninyo pero may respeto kamo sa isa kag isa. Kon ang tanan nga tawo pareho sa inyo, sigurado nga mangin mas maayo gid ang kalibutan!”

May isa pa gid ka lalaki nga nagsiling parte sa mga Saksi ni Jehova: “Maayo gid kamo makig-angot sa mga tawo, kag isa kamo sa pinakamaayo nga mga grupo sang tawo.”

Isa ka mag-asawa nga Arabic, nga halos isa ka tuig na nga nagaistar sa Germany, ang nag-agda sa mga kauturan nga magsulod sa ila balay para mag-tsa. Pagkatapos mapaathag sang mga kauturan kon ngaa nakakadto sila, ang asawa namangkot, “Mga Saksi ni Jehova kamo?” Sang magsiling ang mga utod nga huo, ang asawa nagsabat: “Tuod? Pila na ka bulan ko kamo ginapangita. Nagkadto pa gani ako sa estasyon sang tren para pangitaon kamo. Tapos ari na kamo. Nagkadto gid kamo ’di! Ginpadala gid kamo sang Dios.”

Ginpakamaayo gid ni Jehova ang kapisan sang mga kauturan nga nag-upod sa sining pinasahi nga kampanya para mabantala ang paglaum sa Biblia sa “mga tawo sa tanan nga pungsod.”—Mateo 28:19.