Ang part 1 sini nga serye nagreport parte sa papel sang jw.org para mangin available ang digital nga mga video kag mga publikasyon. Ang part 2 magasugid kon paano gingamit ang jw.org para mangin updated ang mga kauturan sa bilog nga kalibutan sa mga balita kag mga impormasyon parte sa mga Saksi ni Jehova.

Suno sa Tion nga mga News Article: Mabasa pirme sa JW News nga seksion sang jw.org ang bag-o nga mga artikulo sang masaligan nga mga impormasyon parte sa aton mga kauturan. Nalakip sa sini ang regular nga mga update parte sa mga kalamidad kag pagbulig sa mga biktima sini, paghingabot sang gobierno, ilegal nga pagpriso sa mga kauturan naton sa sarisari nga pungsod, kag iban pa nga importante nga mga impormasyon. Halimbawa, sang Marso 21, 2017, ginpahibalo sang isa ka artikulo ang tanan nga kauturan sang posibilidad nga ma-ban ang pagsimba sang mga Saksi ni Jehova sa Russia. Nalakip man sa artikulo ang imbitasyon nga magsulat sa mga opisyal sang gobierno sang Russia.

Breaking News Alert: Ang Breaking News nga feature una nga naggua sa jw.org sang Hulyo 2017. Ining malip-ot nga mga alert nga pila lang ka sentence nagapahibalo sa mga kauturan sang mga breaking news. Halimbawa, may mga alert kon ginpagua ang mga kauturan nga ginpriso bangod sa ila pagtuo, pareho sang Disiembre 31, 2020, sang ginpagua si Feliks Makhammadiyev sa prisuhan sa Russia kag nakaupod na liwat ang iya asawa nga si Yevgeniya. Sa tion sang pandemic, gingamit man ang Breaking News alert para ipahibalo ang online nga mga sesyon sang kombension kag ang importante nga mga desisyon sang Nagadumala nga Hubon sang mga Saksi ni Jehova, pareho sang pagbalik sa face-to-face nga mga miting kag pagbantala sa publiko. Madamo sini nga mga alert ang ginpagua pila lang ka oras sa tapos nga may natabo nga importante nga balita sa isa ka bahin sang kalibutan. Halimbawa, sang Hunyo 2018, ginpagua ang isa ka Breaking News sa tapos naghimo sang importante nga desisyon ang Constitutional Court sang South Korea. Nagsiling ang korte nga wala masunod sang South Korea ang ila constitution bangod wala sila maghatag sang alternative civilian service.

Update sang Nagadumala nga Hubon: Sang Marso 18, 2020, ang una nga update sang Nagadumala nga Hubon ginpagua sa jw.org para maghatag sang pagpalig-on sa tion sang COVID-19 nga pandemic. Madamo gid ang nagaugyon sa ginsiling sang isa ka sister parte sa sini nga mga update: “Daw mga abyan sila nga personal nga nagapangamusta sa akon kon bala OK ako. Indi ko maimadyin kon paano ko atubangon ang pandemic kon wala ini nga mga update. May update gid sa tion nga kinahanglan ko ini.” Asta sa sini nga report, mga 28 tanan ka suno sa tion nga mga update ang gin-release.

Samtang padayon nga nagagamo pa gid ang kalibutan kag madamo nga hitabo ang kadasig lang nga nagakatabo, nagabudlay man makakita sang masaligan nga mga balita. Pero nalipay kita nga ang aton mga kauturan makabaton sang suno sa tion kag sibu nga mga balita sa jw.org. Nagabulig ini sa kada isa sa aton nga ‘magpakalinong kag magsalig’ sa aton Dios nga si Jehova.—Isaias 30:15.

• Video nga gina-download kada bulan

• Adlaw-adlaw nga nagabukas sang website kada bulan

• Pahibalo parte sa kampanya sa bilog kalibutan nga maghimo sang sulat, Marso 2017

• Pagpagua sang una nga update sang Nagadumala nga Hubon, Marso 2020

• Pahibalo sang pagbalik sang face-to-face nga mga miting, Marso 2022

• Pahibalo sang pagbalik sang pagbantala sa publiko, Hunyo 2022

• Pagpagua sang online nga mga sesyon sang kombension, Hunyo asta Agosto, 2022