May ginhiwat nga sunodsunod nga mga conference sa Moldova, sa Russia, kag sa Ukraine para sa ika-70 nga anibersaryo sang Operation North. Ang Operation North, amo ang pag-deport sang Soviet sa 9,793 ka Saksi ni Jehova pakadto sa Siberia sakay sa tren. Natabo ini sang 1951.

Sa sini nga mga conference, ang mga nagtambong ginpangabay nga buksan ang 1951deport.org. Ginabinagbinag sa sini nga website ang parte sa Operation North. Ini nga website ginhimo sang mga Saksi ni Jehova kag mabasa ini sa English, Russian, kag Ukrainian. Madamo diri sing impormasyon kag mga paathag parte sa natabo nga pag-deport.

Si Dr. Lidia Padureac sang Alecu Russo State University of Balti nagsiling: “Sang 1951, gin-deport sang USSR ang mga tawo para silutan sila kag para indi nila mapalapta ang iban nga pagpati magluwas lang sa Komunismo.”

Pero, suno kay Dr. Nicolae Fustei, isa ka scientific researcher sang Institute of History: “Wala gid natuman ang katuyuan sang Operation North. . . . Wala nadula ang organisasyon sang mga Saksi ni Jehova, kag ang mga miembro sini wala nag-untat sa pagbantala parte sa ila ginapatihan. Kundi, nangin mas maisog pa gid sila sa paghimo sini.”

Si Dr. Virgiliu Birladeanu, isa ka scientific researcher sa Institute of History kag amo ang moderator sa sini nga conference. Ginsugid niya ang dalayawon nga kabakod sang gin-deport nga mga Saksi nga nainterbyu niya sa iya pag-research. Nagsiling sia: “Nakita ko sa ila mga mata nga may kalinong sila kag paglaum. Nagdayaw gid ako sa ila. Wala gid sila sing kaakig sa gobierno sang Soviet bisan pa sang ila naeksperiensiahan.”

Si Brother Victor Dornicenco, nga nagaalagad sa branch Moldova, nagsiling nga ang nagakatabo subong sa mga Saksi sa Russia pareho gid sa natabo sadto sa panahon sang Soviet. Nagsiling sia: “Wala gid sila nakatuon sing leksion sa natabo sadto. Sang tingadlaw sang 2017, gin-ban ang Religious Organization sang mga Saksi ni Jehova sa Russia, bisan wala sing basihan. Apektado sa sini ang mga 175,000 ka tawo. Bangod sa diskriminasyon kag sala nga impormasyon parte sa ginapatihan sang mga Saksi ni Jehova, ginkuha sa ila ang ila panguna nga mga kinamatarong, pareho sang kinamatarong sa paghunahuna, konsiensia, kag kahilwayan sa relihion.”

Suno sa nareport na, lima ka scholar kag mga human rights expert, pati si Brother Yaroslav Sivulskiy nga isa representante sang European Association sang mga Saksi ni Jehova, ang gin-imbitar sa sini nga conference. Gin-istorya nila sa media ang natabo sadto sa Operation North kag ang nagakatabo subong nga paghingabot sa Russia. Ini nga conference gin-broadcast sing live sa Internet sa English kag Russian nga lenguahe.

Suno sa na-report na, ini nga conference gin-broadcast sing live sa Internet sa Russian nga lenguahe.

Katorse ka scholar halin sa anom ka pungsod, pati si Brother Ivan Riher halin sa branch sa Ukraine, ang gin-imbitar para maghatag sing malip-ot nga pamulongpulong. Sa ila pag-research, gin-interbyu sang iban nga scholar ang mga gin-deport sadto. Ginpakita sa mga tumalambong ang malip-ot nga bahin sang video sini nga mga interbyu.

Dr. Tomasz Bugaj, nga isa ka historian kag researcher sang Institute of Culture Sciences sa University of Silesia sa Poland, nagsiling: “Mabudlay gid ang kabuhi sang mga Saksi ni Jehova sa Siberia kag grabe gid kabudlay sang ginpaobra sa ila. Pero bisan pa sini, nangin malig-on sila gihapon sa ila pagtuo kag padayon nila nga ginhimo ang ginapatihan sang ila relihion. Wala gid nila ginpensar nga magkompromiso. Wala gid nila ini ginbaylo sa mas maayo nga trabaho, mas maayo nga sitwasyon, kag sa pagkaon.” Para kay Dr. Bugaj, “pinasahi” gid ang mga Saksi kay bisan pa sang kabudlayan nga ila naagyan sa paggahom sang mga Komunista, wala gid sila nagbiya sa ila relihion.

Si Professor Liudmyla Fylypovych amo ang vice-president sang Ukrainian Association of Religious Studies. Ginsugid niya nga sa Ukraine subong, nagapanagtag ang mga Saksi ni Jehova sang ila mga publikasyon nga nabase sa Biblia sa 36 ka lenguahe. Ginsugid man niya nga nakabulig bisan sa mga indi Saksi ang ginahimo nga pagministeryo sang mga Saksi ni Jehova. Nagsiling sia: “Nakabulig ang mga Saksi para masolbar ang pila ka problema sa Ukraine.” Halimbawa, nagsiling sia nga daku gid ang nabulig sang mga Saksi sa mga apa kag mga bulag. Suno sa iya, bangod sa ila ginahimo nga pagtudlo sing Biblia sa sini nga mga tawo, nabatyagan nila nga importante gali sila sa komunidad.

Ini nga conference gin-broadcast sing live sa Internet sa English, Russian, kag Ukrainian nga lenguahe.

Si Professor Fylypovych nagsiling: “Masarangan sang mga Saksi ni Jehova nga mag-adjust sa lainlain nga sitwasyon. Kag bisan ano pa kabudlay sang ila sitwasyon, masugid nila gihapon ang ila mga ginapatihan sa iban. . . . Sang panahon sang Soviet, nagdayaw gid ang mga tawo sa mga Saksi ni Jehova bangod wala gid nila ginkompromiso ang ila mga ginapatihan.”

Si Professor Igor Kozlovskyy nga amo ang presidente sang Center of Religious Science Research and International Spiritual Relations sa Ukraine, nagsiling: “Para maintiendihan naton kon sin-o kita, dapat naton dumdumon ang natabo sang una. . . . Dapat naton dumdumon pirme ang pag-deport sa mga Saksi ni Jehova. Dapat ini ilakip sa kasaysayan sang Ukraine.” Nagsiling pa sia: “Responsibilidad sang mga nagatuon sa relihion nga dulaon ang dumot kag tadlungon ang sala nga mga pagpati parte sa mga Saksi ni Jehova, pati man sa iban pa nga relihion.”

Ini nga conference gin-broadcast sing live sa Internet sa English kag Ukrainian nga lenguahe.