DISIEMBRE 8, 2022
BALITA SA BILOG NGA KALIBUTAN

Si Brother Dubovenko kag si Brother Litvinyuk Ginsentensiahan nga Mapriso sing Anom ka Tuig

I-PLAY

Sang Nobiembre 30, 2022, nagdesisyon ang Armyanskiy City Court of the Republic of Crimea nga guilty si Brother Aleksandr Dubovenko kag si Brother Aleksandr Litvinyuk. Pareho sila nga ginsentensiahan nga mapriso sing anom ka tuig kag gilayon sila nga ginpriso.

Impormasyon Parte sa Ila

Aleksandr Dubovenko

Natawo: 1973 (Ochakiv, Ukraine)

Biograpiya: Nagaobra sia bilang welder, electrician, kag finish carpenter. Napangasawa niya si Irina sang 1999

Nangin isa sa mga Saksi ni Jehova ang iya nanay kag amo ini ang nagtudlo sa iya sang kamatuoran. Nanamian gid sia sa promisa sang Biblia nga paraiso nga duta. Nabawtismuhan sia sang 1999

Ang Iya Ginsiling a

Paano mo nasarangan ang kabudlayan sang gin-house arrest ka?

Sa sulod sang 13 ka bulan, wala ako ginpasugtan nga mag-istorya kay bisan sin-o nga indi ko upod sa balay luwas lang sa mga imbestigador ukon mga abogado. Asta subong wala gihapon ako ginapasugtan nga mag-istorya sa mga kauturan nga witness sa akon kaso. Pero, napalig-on ako sa halimbawa ni Elias. Ara sia sa kamingawan kag nagalalain gid sia. Ginpabakod sia ni Jehova kag ginpasalig nga wala sia nagaisahanon. Wala ginpabay-an ni Jehova si Elias, gani kumbinsido ako nga indi man niya ako pagpabay-an.

Aleksandr Litvinyuk

Natawo: 1960 (Amangeldi, Kazakhstan)

Biograpiya: Nag-obra sia sa isa ka planta sang kemikal kag bilang welder. Napangasawa niya si Nadezhda sang 1979. May duha sila ka bata nga lalaki kag isa ka bata nga babayi

Ginpaligban niya kon ngaa ginpasugtan sang Dios ang pag-antos kag kalainan. Nakita niya ang sabat sang nag-Bible study sila ni Nadezhda upod sa mga Saksi ni Jehova. Nabawtismuhan sia sang 1993

Ang Iya Ginsiling b

Paano mo ginhandaan ang paghingabot?

Sang nabalitaan ko ang nagakatabo sa akon mga kauturan, ginpamensar ko kon bala mabatas ko man ang mga paghingabot. Siling ko, indi pa ako handa. Gani ginbasa ko ang mga kasaysayan sa Biblia parte sa mga tawo nga nagbatas sang mabudlay nga mga pagtilaw kag ginpamalandungan ini. Gintun-an ko kon paano sila nakabatas kag nagsalig kay Jehova. Kon naga-research ako, ginatinguhaan ko gid nga imadyinon ang natabo sa ila. Ginrebyu man namon nga mag-asawa ang sugilanon sa kabuhi sang matutom nga mga kauturan sa aton panahon subong. Nagpabakod gid ini sang amon pagtuo kag naghanda sa amon sa bisan ano man nga matabo.

Paano nakabulig ang mga pangamuyo sang iban sa imo?

Nagatulo gid ang akon luha kon mabatian ko nga pirme gid ako ginalakip sang mga kauturan sa ila mga pangamuyo. Ginapangabay nila si Jehova nga buligan ako nga mangin kalmado, maisog, kag mabakod. Antes sang kada hearing sa korte, ginapamangkot ako sang isa ka brother kon ano nga kabalaka parte sa akon kaso ang ginsambit ko sa akon pangamuyo sina nga adlaw. Dayon ipangamuyo man niya ini samtang nagahulat sia sa gua. Nagpalig-on gid ini sa akon.

Makapalig-on nga mahibaluan nga si Jehova ara gid pirme sa aton tupad bisan diin ukon bisan san-o man kita makaatubang sang mga kabudlayan.—Salmo 139:7-12.

Time Line

Agosto 2, 2021

Ginsugdan ang kaso. Gin-akusar ang duha ka brother nga nagagamit sang videoconferencing software para suportahan ang mga hilikuton sang isa ka extremist nga organisasyon
Agosto 5, 2021

Gin-raid ang mga balay sang walo ka pamilya sang mga Saksi ni Jehova, pati ang balay sang mga Dubovenko kag mga Litvinyuk. Si Brother Litvinyuk gin-aresto kag ginbutang sa temporary detention
Agosto 6, 2021

Si Brother Litvinyuk ginpagua sa temporary detention pero gin-house arrest gihapon
Agosto 9, 2021

Gin-raid sang mga awtoridad ang balay sang mga Dubovenko sa ikaduha nga tion. Gin-interogar si Aleksandr kag gin-house arrest
Agosto 11, 2021

Ginkasuhan si Brother Litvinyuk nga nagaorganisar sang mga hilikuton sang isa ka extremist nga organisasyon
Pebrero 8, 2022

Ginkasuhan si Brother Dubovenko nga nagaorganisar sang mga hilikuton sang isa ka extremist nga organisasyon
Abril 29, 2022

Ginsugdan ang hearing. Gin-deny sang judge ang pangabay ni Brother Litvinyuk nga makapadoktor kag makapabulong samtang gina-house arrest sia
Septiembre 8, 2022

Ginpasugtan ining duha ka brother nga makagua sa ila balay halin sa alas 7:00 sang aga asta alas 7:00 sang gab-i
Nobiembre 30, 2022

Ining duha ka brother ginsentensiahan nga mapriso sing anom ka tuig

a b Ini nga interbyu ginhimo antes pa sia masentensiahan.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE