Sang Marso 29, 2021, ang Gagarinskiy District Court of the City of Sevastopol, sa Crimea, nagdesisyon nga guilty si Brother Viktor Stashevskiy kag ginsentensiahan sia nga mapriso sing anom ka tuig kag tunga. Insigida nga gindala sang mga awtoridad si Viktor kag ginbutang sia sa detention center. Iapelar niya ang desisyon sa iya kaso.

Viktor Stashevskiy

• Natawo: 1966 (Kansk, Krasnoyarsk Territory, Russia)

• Biograpiya: Nagsaylo sia sa Sevastopol, Crimea, sang 1983. Sang 1993, nagretiro sia sa navy. Sang 2002, napangasawa niya si Larisa. May duha sila ka bata nga babayi. Nagdayaw gid sia sa komplikado pero organisado nga uniberso, kag gusto gid niya makilala ang Manunuga. Sang nagtuon sia sing Biblia, natun-an niya kon ano ang katuyuan sang kabuhi. Nabawtismuhan sia bilang isa sa mga Saksi ni Jehova sang 2004

Sang Hunyo 4, 2019, gin-raid sang mga agent sang Federal Security Service (FSB) ang pulo ka balay sang mga Saksi ni Jehova sa Sevastopol. Ang iban sini nga pagpang-raid naglawig sing asta sa apat ka oras. Sina nga tion, wala ginpasugtan sang mga agent sang FSB ang mga brother kag ang ila mga pamilya nga mag-inom sang tubig ukon maggamit sang kasilyas. Ginpahog man sila sang mga agent nga panggub-on kag butangan sing planted nga mga illegal drug ang ila mga gamit.

Sa tapos sang pag-raid, gin-aresto si Brother Viktor Stashevskiy kag gin-detain sing isa ka gab-i. Gin-akusar sia nga “amo ang lider sang isa ka extremist nga organisasyon.” Pero ang matuod, ginkasuhan sia bangod sa iya relihioso nga mga pagpati. Maathag gid ini nga paglapas sa iya mga kinamatarong base sa konstitusyon.

Si Viktor nagsiling nga ang nakabulig gid sa iya nga mangin maisog kag malipayon gihapon amo ang iya regular nga pagbasa sang Biblia kag pagpamalandong parte sa iya nabasa. Napabakod gid sia sang ginsiling ni Hari David sa Salmo 62:5-8. Parte sa tanan niya nga kabudlayan nga naeksperiensiahan, si Viktor nagsiling: “Nagbakod pa gid ang akon relasyon kay Jehova. Nabatyagan ko nga wala gid niya ako ginpabay-an amo nga sia ang pinakasuod nga persona sa akon. Sigurado ako nga nakita ni Jehova ang akon kabudlayan. Nakita man niya nga gusto ko gid nga mangin matutom sa iya. Kabalo man ako nga pangapinan niya ako sa insakto gid nga tion, para indi mahuy-an ang iya balaan nga ngalan.”

Kabalo kita nga buligan kag pakamaayuhon ni Jehova si Viktor, ang iya pamilya, kag ang tanan naton nga kauturan nga nagabatas sang paghingabot. Si Jehova amo ang ila dalangpan kag kuta.—Salmo 91:2.