OKTUBRE 28, 2022
BALITA SA BILOG NGA KALIBUTAN
Sobra Na 100 ang mga Saksi nga Napriso Subong sa Russia kag Crimea
Asta sang Oktubre 26, 2022, may 106 ka brother kag 4 ka sister nga ginpriso ukon ginbutang sa pretrial detention bangod sang ila paghimo sang mga hilikuton sang ila relihion sa Russia kag Crimea. Si Brother Dmitriy Dolzhikov, nga 44 anyos, amo ang ika-100 nga alagad ni Jehova nga ginpriso. Gin-aresto si Dmitriy sang Septiembre 8, 2022. Ginkasuhan sia nga nagapakigbahin sa mga hilikuton sang isa ka extremist nga organisasyon bangod nag-attend sia sa Cristiano nga mga miting kag ginsugid niya ang iya pagpati sa iban. Mga 350 na ka Saksi ang napriso halin sang pag-ban sang 2017.
Gin-aresto si Dmitriy pagkatapos ma-raid ang iya apartment sa Chelyabinsk Region. Pagligad sang duha ka adlaw gindala sia sa pretrial detention sa Novosibirsk Region, nga mga 1,500 ka kilometro halin sa iya balay.
Ginbutang si Dmitriy sa isa ka selda nga may 12 ka iban pa nga priso. Indi sia puede bisitahan sang iya asawa nga si Marina, pero nagasulatay sila.
“Sang gin-aresto si Dmitriy, indi ako makatulog sing maayo kag nagabugtawbugtaw ako,” siling ni Marina. “Ginhagad ako sang mga kauturan nga didto lang ko anay sa ila balay, kag nangin daku gid ini nga bulig sa akon.”
Si Marina nagsiling nga si Dmitriy kalmado kag positibo lang gihapon. “Ginaatipan sia ni Jehova,” siling niya.
Si Marina kag si Dmitriy Dolzhikov
Ang aton mga kauturan ginkasuhan nga nagahimo sang extremist nga hilikuton base sa Russian Federation Criminal Code. Lakip sa ila ang 57 anyos nga si Anna Safronova, nga ara subong sa prisuhan kay ginsentensiahan sia sang anom ka tuig nga pagkapriso. Amo ini ang pinakamalawig nga sentensia para sa isa ka sister.
Ang pag-aresto kay Dmitriy dugang pa nga pamatuod sang makahuluya nga kampanya sang Russia batok sa mga Saksi ni Jehova, nga nagapadayon sa sobra na lima ka tuig bisan pa madamo nga beses nga ginakondenar ini sang internasyonal nga mga organisasyon. Sang nagdesisyon ang Supreme Court sang Russia sang 2017 batok sa mga Saksi ni Jehova, nagsiling ang mga awtoridad sang Russia nga ipasira nila ang legal nga mga korporasyon pero indi sila magpasilabot sa mga espirituwal nga hilikuton sang mga Saksi. Pero, indi gid amo sini ang natabo. Subong, may 308 ka kaso nga ginpasaka batok sa 700 ka Saksi ni Jehova. Dugang pa, 1,851 na ka balay sang mga Saksi ang gin-raid.
Ginapangamuyo gid naton si Dmitriy kag ang tanan naton nga kauturan nga ginahingabot bangod sang ila pagtuo. Nahibaluan naton nga padayon sila nga hatagan ni Jehova sang kusog para makabatas.—Mateo 24:13.