Sang Sabado, Oktubre 5, 2019, ginhiwat sang Watch Tower Bible and Tract Society of Pennsylvania ang tuigan sini nga business meeting sa Assembly Hall of Jehovah’s Witnesses sa Newburgh, New York, U.S.A. Pagkatapos sini nga miting, ang Nagadumala nga Hubon naghatag sang makapalig-on nga mga pamulongpulong nga gintambungan sang 20,679, lakip ang mga lugar nga naka-tie in sa sini nga programa. Ari ang sumaryo sang kada bahin. *

Si Brother Gerrit Lösch, ang tsirman sang programa, amo ang naghatag sang nagabukas nga pamulongpulong base sa Mateo 23:10, nga nagapahanumdom sa aton nga si Jesucristo amo ang aton lider, kag indi ang bisan sin-o nga tawo.

Ginpaathag ni Brother Stephen Lett nga importante gid ang malipayon nga paghatag. Ang isa ka paagi nga mapakita naton ang aton kaalwan amo ang pagsuporta sa aton ministeryo sang pagbulig. Ginsaysay ni Brother Lett ang sumaryo sang mga halit nga resulta sang mga kalamidad kag ang sunodsunod nga mga bulig nga ginhimo sang 2018 kag 2019 nga mga tuig sang pag-alagad. Sobra 900,000 ka kauturan ang naapektuhan sini nga mga trahedya; sobra 700 ka Kingdom Hall kag 15,000 ka balay sang aton kauturan ang nahalitan ukon naguba gid. Ang mga Saksi ni Jehova naggasto sing $49.5 ka milyon sa sini nga mga pagbulig.

Ini nga bahin may mga video nga nagapakita sang bug-os tagipusuon nga pagpasalamat sang aton mga kauturan nga nakabenepisyo sa aton ministeryo sang pagbulig.

Ginapaathag sa sini nga video nga mga 80,000 ka bilding sa bilog nga kalibutan ang ginamentinar sang mga Saksi ni Jehova. Ginapakita man sini kon paano naton ginamentinar, gina-renovate, kag ginapatindog ang mga bilding nga ginagamit naton sa pag-alagad.

Makita sa sini nga video ang pag-interbyu sa tatlo ka brother nga nagbulig sa pagpili kag pagbakal sang mga propiedad para sa branch sa United States kag sa world headquarters: sila amo sanday Brother Max Larson, George Couch, kag Gilbert Nazaroff. Gin-istorya sining tatlo ka brother kon paano nila maathag nga nakita ang pagbulig ni Jehova para mabakal ang sarisari nga mga propiedad.

Sa sini nga video, ginapahibalo nga plano sang mga Saksi ni Jehova nga tingbon ang media production sa isa ka bag-o nga pasilidad nga tukuron sa Ramapo, New York. Ini nga propiedad mga tatlo ka kilometro ang kalayuon sa world headquarters sa Warwick, New York. Ginaplano nga sugdan ini sa 2022 kag matapos sa Disiembre 2026. Ginabulubanta nga sa mga adlaw nga tudotudo gid ang obra, ini nga proyekto magakinahanglan sing 1,500 ka boluntaryo kada adlaw.

Sa sini nga video, ginpaathag nga sugod sa Enero 2020, ang mga manugbantala nga interesado nga magpasangkad sang ila ministeryo puede na magpil-ap sang mga aplikasyon sa jw.org kag i-submit ini sa ila hubon sang mga gulang para marepaso.

May mga audio file sa jw.org nga puede na ma-access paagi sa Amazon Alexa ukon Google Assistant.

Gin-athag ni Brother David Splane ang aton paghangop sa mga tagna nga narekord sa Joel kapitulo 2 parte sa nagapanong nga mga apan. Nalangkag na kita nga tun-an ining gin-athag nga paghangop kon maggua ini sa Ang Lalantawan.

Ginbinagbinag ni Brother Samuel Herd ang mga benepisyo sang New World Translation of the Holy Scriptures (Study Edition) nga puede na ma-access online. Pagkatapos ginpagua niya ang naimprinta nga edisyon sang New World Translation of the Holy Scriptures (Study Edition) nga nagaunod sang mga libro sang Mateo asta sa Binuhatan. Ang mga manugbantala puede makaorder sang kopya sini sa ila lokal nga mga kongregasyon.

Ginpadaku ni Brother Anthony Morris nga para sa matuod nga mga Cristiano, ang pagbantala sang maayong balita amo ang aton pinakaimportante nga asaynment. Ang teokratiko nga mga pasilidad nagasuporta sa Nagadumala nga Hubon sa pag-organisar sang pagbantala kag sa pag-aman sang espirituwal nga pagkaon sa katawhan ni Jehova. Ginkutlo ni Brother Morris ang makapahulag nga mga tinaga sa Nobiembre 15, 1976 nga gua sang Lalantawan: “Sa pag-abot sang ‘dakung kapipit-an’ dapat masako gid kita sa aton pagbantala, dapat ara gid kita sa pinakamasako nga tion sa pagbantala nga hilikuton sa bilog nga kalibutan. Ang pag-abot ni Ginuong Jesus para maghukom magakibot gid sa tanan—pati sa mga alagad ni Jehova kay magaabot ini sa tion nga masako gid sila katama sa paghimo sang iya hilikuton!”

Ginpaathag ni Brother Mark Sanderson nga pareho sa gintagna ni Jesus, ginapaabot sang katawhan sang Dios nga dumtan sila sang “tanan nga pungsod.” (Mateo 24:9) Pero, ginpalig-on kita ni Brother Sanderson nga kahadlukan, indi ang tawo, kundi si Jehova.—Salmo 111:10.

Ginpagua ang isa ka makatalandog nga video sang aton kauturan sa Russia nga nagaistorya kon paano nila nadaug ang ila kahadlok sa paghingabot. Ini nga pamulongpulong kag video nagpalig-on sa tanan nga katawhan ni Jehova nga indi man mahadlok.

Si Brother Geoffrey Jackson naghimo sing praktikal nga mga aplikasyon sang mga teksto sa Cristianong Griegong Kasulatan nga nagagamit sing termino nga literal nga nagakahulugan sing “sa insakto nga pamensaron.” Ginpadaku man niya nga importante gid nga ‘padayon naton nga huptan nga bug-os ang aton ikasarang sa paghunahuna sing maayo’ (ukon sa literal, “sa insakto gid nga pamensaron”) sa sining katapusan nga mga adlaw.—1 Pedro 1:13.

Gin-anunsio ni Brother Kenneth Cook ang tuigan nga teksto para sa 2020, ang Mateo 28:19: “Gani kadtui ninyo ang mga tawo . . . , kag tudlui ninyo sila agod mangin disipulo ko. Bawtismuhi ninyo sila.” Ginpadaku niya nga kinahanglan buligan ang mga may husto nga panimuot para makadedikar sila sang ila kabuhi kay Jehova kag mabawtismuhan.

Ang espirituwal nga mga programa pareho sang annual meeting nagapahulag sa aton nga padayon nga magpanikasog gid sa aton pag-alagad kay Jehova.