MAYO 9, 2022
BALITA SA BILOG NGA KALIBUTAN

UPDATE—GINPRISO ANG MGA BROTHER | Ang mga Pamilya sa Crimea Nagabatas sa Bulig ni Jehova

I-PLAY

Sang Oktubre 6, 2022, nagdesisyon ang Nakhimovskiy District Court of Sevastopol nga guilty sanday Brother Vladimir Maladyka, Brother Vladimir Sakada, kag Brother Yevgeniy Zhukov. Ang kada isa sa ila ginsentensiahan nga mapriso sing anom ka tuig. Ginpriso sila gilayon.

Time Line

Oktubre 1, 2020

Gin-raid sang mga FSB agent ang balay sang siam ka pamilya sang mga Saksi ni Jehova sa Sevastopol, lakip ang balay sang mga Maladyka, Sakada, kag Zhukov. Sa tion sang pag-raid sa balay sang mga Maladyka, may nakita ang mga agent nga isa ka pakete sang powder nga gatas. Siling sang mga agent daw “drugs” ini gani gindala sang mga awtoridad si Brother Maladyka kag ang iya asawa nga si Nataliya, sa isa ka psychiatric facility para eksaminon. Ginbuy-an si Nataliya pagkahapon sina man nga adlaw. Si Brother Maladyka, si Brother Sakada kag si Brother Zhukov ginbutang sa temporary detention. Ginsaylo sila sa isa ka pretrial detention center pagkasunod nga adlaw
Marso 23, 2021

Si Brother Sakada ginpagua sa pretrial detention pero gin-house arrest gihapon. Ginpasuksukan sia sang tracking device kag ginmanduan nga indi maggamit sang Internet, magtawag sa telepono, ukon mag-istorya sa iban nga mga utod nga nalakip sa sini nga kaso
Marso 30, 2021

Si Brother Maladyka ginpagua sa pretrial detention pero gin-house arrest gihapon
Mayo 17, 2021

Si Brother Zhukov ginpagua sa pretrial detention pagligad sang sobra pito ka bulan pero gin-house arrest gihapon
Septiembre 30, 2021

Ginsugdan ang hearing

Impormasyon Parte sa Ila

Vladimir Maladyka

Natawo: 1963 (Yenakievo, Ukraine)

Biograpiya: Nag-obra bilang aircraft technician kag mechanic sa sulod sang madamo nga tinuig. Napangasawa niya si Nataliya sang 1986

Nakaeksperiensia sing kabudlayan ang iya pamilya gani ginsugdan niya ang pagpangita sa Dios. Nakilala niya ang mga Saksi ni Jehova paagi sa iya manghod nga lalaki. Dungan sila nga nabawtismuhan ni Nataliya sang 1997

Ang Iya Ginsiling

Nakita mo bala kon paano ginsakdag ni Jehova ang imo pamilya paagi sa mga kauturan?

Sang ara ako sa detention center, ang akon asawa ginhatagan sang materyal nga mga butang, ginpaumpawan, kag ginpalig-on sang mga kauturan paagi sa Pulong sang Dios. Pirme nila sia ginatawgan sa telepono ukon gina-text kag ginapadal-an sing mga card para kamustahon sia. Ang iban nagakadto sa balay para palig-unon kag suportahan sia.

Para sa madamo nga kauturan sa kongregasyon isa ka pribilehiyo nga may himuon sila para magbulig. Maabtik gid nga nagbulig ang tanan sa amon kongregasyon, kag ‘nahiusa’ sila sa paghimo sini.—Sofonias 3:9.

Vladimir Sakada

Natawo: 1970 (Kyiv, Ukraine)

Biograpiya: Na-train sia para mangin operator sang mga makinarya kag nangin miembro man sia sang militar. Nagaobra sia bilang builder. Napangasawa niya si Svetlana sang 2005

Nagdaku sia nga isa ka atiesta. Nangin interesado sia sa Biblia sang ginpakita sa iya sang iya abyan ang ngalan sang Dios. Nakita niya ang praktikal nga kaalam sang Pulong sang Dios. Nabawtismuhan sia sang 1991

Ang Iya Ginsiling

Ano ang natun-an ninyo nga mag-asawa parte sa importansia sang regular nga pagsimba sa Dios?

Ang sarisari nga bahin sang aton pagsimba, naangot sa isa kag isa. Daw nagaporma sila sang isa ka espirituwal nga “grupo sang mga maskulo.” Ginaehersisyo naton ini nga mga maskulo paagi sa paghanda kag pagpakigbahin sa mga miting kag pagbantala, pagpangamuyo kag pagtuon sa Biblia kada adlaw, kag pagpakig-upod sa aton mga kauturan . . . Bisan pa gin-ban ang aton mga hilikuton, padayon kami nga nagapangita sing paagi nga masimba si Jehova para suod gihapon ang amon relasyon sa iya.

Yevgeniy Zhukov

Natawo: 1969 (Sevastopol, Crimea)

Biograpiya: Natawo sia sa isa ka daku nga pamilya. Napatay ang tatay ni Yevgeniy sang 14 anyos sia

Sang pamatan-on sia, nagtuon sia sa pagtokar sang piano sa music school. Na-train sia sa pagtakod sang mga tubo kag sang ulihi nag-obra sia sa isa ka factory

Sa tapos sia magserbisyo sa militar, nagpalibog sia kon ano ang kahulugan sang kabuhi. Ginhatagan sia sang iya iloy sang Biblia, kag didto niya nakita ang makapakumbinsi nga mga sabat sa iya mga pamangkot. Nabawtismuhan sia sang 1997

Ang Iya Ginsiling

Paano ka ginbuligan ni Jehova sang ara ka sa detention center?

[Sang una nga binulan sang 2021,] nabalaka ako kon paano ako makaselebrar sang Memoryal. Una nga bes ini nga indi ko makaupod ang amon kongregasyon. Gani nangamuyo ako, kag ginsabat ni Jehova ang akon pangamuyo paagi sa paghatag sa akon sang kusog kag kaalam. Sa bulig ni Jehova, nahatag ko ang pamulongpulong sa Memoryal nga gintambungan sang duha ko ka kaupod sa selda. Nangin maayo ini nga panaksi sa ila.

Nagasalig kita nga pabakuron ni Jehova ang tagipusuon sini nga kauturan kag sang tanan nga ginahingabot sa Crimea.—1 Tesalonica 3:12, 13.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Crimea

Ang mga Saksi ni Jehova sa Crimea ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE