Sa Marso 5, 2020, ipahibalo sang Dzhankoysky District Court sang Republic of Crimea ang desisyon sini sa kaso ni Brother Sergey Filatov. Gusto sang piskal nga prisuhon sia sing pito ka tuig sa maximum-security prison. Si Brother Filatov amo ang una nga Saksi sa Crimea nga ginkasuhan base sa Criminal Code sang Russia.

Suno sa nareport na, gin-aresto si Brother Filatov pagkatapos sang isa sa pinakadaku nga special operation batok sa aton mga kauturan sang nagligad nga mga tinuig. Sang Oktubre 10, 2017, nagtipon ang mga abyan kag kakilala ni Brother Filatov sa iya balay para mag-istoryahanay parte sa Biblia kag magkanta sang mga Kingdom song. Sekreto nga ginrekord ini nga pagtilipon sang mga Russian Federal Security Service (FSB) agent. Sulusobra isa ka tuig sang ulihi, sang gab-i sang Nobiembre 15, 2018, gin-raid sang mga 200 ka pulis ang walo ka balay sang mga Saksi ni Jehova sa lugar. Ginhalughog ang balay ni Brother Filatov sang sobra 35 ka pulis, kag halos katunga sa ila mga armado nga soldado sang special forces. Gin-interogar si Brother Filatov kag ginbuy-an man dayon.

Si Brother Sergey Filatov kag ang iya asawa nga si Natalya may apat ka bata, kag ang duha sa ila mga menor-de-edad. Samtang ginahulat ni Brother Filatov ang desisyon sa iya kaso, ginapangamuyo naton nga sia kag ang iya pamilya padayon nga magdangop kay Jehova, nga nagasalig nga buligan Niya sila sa sining tion sang kalisdanan.—Salmo 46:1.