Sa sulod sang pila ka adlaw, daku gid ang halit sang Bagyo Mangkhut sa katundan sang Pacific Ocean kag South China Sea. Ang masunod nga mga report naghalin sa mga branch office nga nagatatap sa kinahanglanon sang mga kauturan nga nahalitan sini nga kalamidad.

Micronesia: Ang Bagyo Mangkhut nanghalit sa Rota, sang Northern Mariana Islands, sang Septiembre 10, 2018. Amo ini ang pinakamabaskog nga bagyo nga nag-igo sa Rota halin sang 2002. Nalipay kami sa pagpahibalo nga wala sang kauturan nga nasamaran kag wala naguba ang isa gid lang ka Kingdom Hall sa isla. May isa ka utod nga kinahanglan anay magsaylo asta makay-o ang iya balay. Ang manugtatap sang sirkito nagbisita sa isla para palig-unon ang mga kauturan.

Philippines: Sang Septiembre 15, 2018, ang Bagyo Mangkhut (nga ginngalanan “Ompong” sa Pilipinas) nanghalit sa Baggao, sa probinsia sang Cagayan, Philippines. Ang Bagyo Mangkhut amo ang pinakamabaskog nga bagyo nga nag-agi sa Pilipinas sini nga tuig. Ang kadamuon sang napatay nakalab-ot na sa 81.

Makapasubo nga bangod sini nga bagyo, isa ka sister nga taga-Benguet ang napatay kag apat ka brother ang nasamaran. Suno sa una nga mga report, 938 ka balay sang aton mga utod ang naguba kag 15 ang wasak gid. Indi magkubos mga 28 ka Kingdom Hall ang naguba, kag isa sini ang halos natabunan sang landslide. Apat ka Disaster Relief Committees (DRC), nga nakabase sa Baguio, Cauayan, Laoag, kag Tuguegarao, ang nagatatap sa pisikal, emosyonal, kag espirituwal nga kinahanglanon sang aton mga kauturan. Pagkasunod nga inadlaw, nagbisita ang miembro sang Branch Committee para palig-unon ang mga kauturan.

Hong Kong: Ang Mangkhut nanghalit sa Hong Kong sang Septiembre 16, 2018. Diutay lang ang halit sini sa branch office kag sa apartment nga ginaistaran sang mga Bethelite. Duha ka balay sang mga utod ang naguba gid. Ang isa natumbahan sang kahoy kag ang isa ginlupad sang hangin ang atop. May pila ka balay nga nabahaan. Ang DRC sa Hong Kong ang nagatatap sa kinahanglanon sang aton mga kauturan.

Ginalakip gid naton sa aton mga pangamuyo ang aton mga kauturan nga biktima sang Bagyo Mangkhut. Nalipay gid kita nga ang aton mga masigka-Cristiano nagabulig sa aton mga kauturan nga nagakinahanglan. Ang aton nahiusa nga espirituwal nga pamilya pagpakamaayo gid halin kay Jehova.—Hulubaton 17:17.