MARSO 3, 2020
BALITA SA BILOG NGA KALIBUTAN

Update sa Coronavirus kag Kon Paano Naton Maproteksionan ang Aton Kaugalingon

I-PLAY

Ginamonitor gid sing maayo sang world headquarters sang mga Saksi ni Jehova ang madasig nga paglapta sang novel coronavirus disease (nga ginatawag man nga COVID-19). Natun-an naton sa mga tagna sang Biblia nga sa katapusan nga mga adlaw may magalapta nga mga balatian. (Lucas 21:11) Kon may madasig maglapta nga balatian, dapat gid kita maghimo sang praktikal nga mga paagi para maproteksionan ang aton kaugalingon kag ang iban.—Hulubaton 22:3.

Mahimo nabalaka kita sa aton mga kauturan nga nagaistar sa mga lugar nga apektado sini nga balatian. Bangod sang grabe gid nga paglapta sang COVID-19, ang mga branch kag mga kongregasyon sa Italy, Japan, South Korea, kag iban pa nga pungsod naghimo na sing kinahanglanon nga mga pagbag-o. Sa pila ka branch, gin-cancel anay ang mga tour kag indi puede magbaton sang mga bisita. Sa mga lugar naman nga gindumilian na sang gobierno ang dalagku nga mga pagtilipon, gin-cancel anay sang branch ang sirkito nga mga asembleya. Dugang pa, may mga lugar man nga kinahanglan i-adjust sang mga kongregasyon ang ila pagbantala kag mga miting sa kongregasyon. Pero bisan amo sini ang sitwasyon, ang aton mga kauturan padayon nga nagabasa kag nagatuon sang Biblia kag nagapalig-unay.—Judas 20, 21.

Sa sini nga mga sitwasyon, nakita sang aton mga kauturan nga makabulig ang masunod nga mga prinsipio. Mahimo makabulig man ini sa imo kag sa imo pamilya kon maglab-ot na sa inyo lugar ining nagalapta nga balatian.

Indi Mag-panic. Maayo man nga mangin alisto kita kag maghanda kon may epidemia, pero indi kita dapat mag-panic sa sobra nga kahadlok.—Hulubaton 14:15; Isaias 30:15.
Sunda ang mga Ginasiling sang Gobierno. Ang lokal nga mga awtoridad masami nga nagahimo sang mga health advisory ukon mga pagdumili para maproteksionan ang ikaayong lawas sang publiko. Maayo gid kon updated kita sa sini kag patihon ini gilayon.—Roma 13:1.
Mangin Matinlo. Importante nga regular nga manghinaw sang kamot gamit ang habon kag tubig ukon maggamit sang alcohol-based nga hand sanitizer. Dapat man naton tinluan pirme ang mga butang nga masami naton ginatandog sa aton balay kag sa aton Kingdom Hall. Ang mga eksperto sa patag sang medisina nagsiling nga mas maayo kon indi anay magkamustahanay kay puede ka malatnan sang balatian paagi sa sini. Kon parte naman sa coronavirus, ang World Health Organization may dugang nga impormasyon para sa publiko.
Magpakita sang Gugma sa Iban. Kabalo kita nga importante ang pagtambong sa Cristianong mga miting kag pagbantala, pero kon nagamasakit ka, mas maayo nga magtener lang anay sa balay para indi malatnan ang iban. Pagpakita ini sang gugma sa aton mga kauturan kag sa aton indi-Saksi nga mga kaingod.—Mateo 22:39.
Sunda ang Temporaryo nga mga Adjustment sa mga Kahimusan sang Kongregasyon. Sa mga lugar nga nalab-ot na sang paglapta sining balatian, mahimo nga i-cancel lang anay sang branch ang mga miting sa kongregasyon, asembleya, kag iban pa nga pagtilipon para sa pagsimba. Amo ini ang ginahimo sa pila ka lugar nga grabe na ang epekto sang COVID-19, pareho sa pila ka mga rehiyon sang Italy, Japan, kag South Korea. Depende sa lokal nga mga sitwasyon, ang mga gulang mahimo mangita sing paagi para matan-aw sang mga kauturan sa ila mismo balay ang narekord nga mga miting. Ang mga kauturan mahimo man magpadayon sa pagbantala paagi sa telepono, text, e-mail, ukon sulat.