Ang International Book Fair sang Santa Cruz ginhiwat sa Santa Cruz de la Sierra, Bolivia, halin sang Mayo 31 asta Hunyo 11, 2023. Sobra 120,000 ka bisita ang nagkadto sa sini nga fair. Ang booth nga ginplastar sang aton mga kauturan nagapadaku sang Ang Lalantawan Num. 1 2023, “Mental Health—Kon Paano Makabulig ang Biblia.”

Mga 200 ka kauturan ang gin-asayn sa booth sa tion sang fair kag gin-abiabi nila ang sobra 20,000 ka bisita. Makita sa TV screen ang mga educational video halin sa aton website, kag natun-an sang mga bisita kon paano mag-research sang sarisari nga mga topiko sa jw.org. Malapit 5,500 ka literatura ang napanagtag, kag mga 600 ka video ang ila napatan-aw. Dugang pa, 45 ka tawo nga nagbisita sa booth ang nangabay sang Bible study gamit ang online form sa jw.org.

Sang nakita sang babayi ang tema nga mental health sa aton booth, ginpalapitan niya ang isa ka sister kag nagsiling sia nga ang iya nanay may problema sa mental kag sa emosyon. Nagsiling ang babayi nga sia mismo may anxiety man kag depression. Ginbuligan sang sister ang babayi nga i-download ang Lalantawan nga magasin parte sa mental health kag ang Magkabuhi sing Wala Katapusan! nga brosyur sa iya cell phone. Ginpil-apan man sang babayi ang online form sa jw.org para magpangabay dayon sang Bible study.

Ang isa ka psychologist nga nakabaton sang kopya sang Ang Lalantawan parte sa mental health sa fair nagsiling: “Plano ko nga ipakita ini nga artikulo sa akon mga pasyente. Makabenepisyo gid sila sa mga impormasyon kag sa mga teksto sa Biblia nga mabasa diri.” May isa ka babayi nga bag-o lang napatyan sang nanay. Napalig-on sia sang ginpakita sa iya ang artikulo nga “Kon Mapatyan sang Ginikanan” nga makita sa seksion nga “Kalinong kag Kalipay” sa jw.org.

Madamo gid ang nagaantos sang problema sa mental kag sa emosyon subong, kag nalipay gid ang aton mga kauturan sa Bolivia nga mabuligan sila kag mapaumpawan halin sa praktikal nga laygay nga ginahatag ni Jehova paagi sa iya Pulong, ang Biblia.—Salmo 34:18.