Ang Pebrero 20, 2024, amo ang ika-50 ka tuig nga anibersaryo sang legal nga pagkilala sa mga Saksi ni Jehova sa Botswana. Sang 1974, ginkilala sing legal ang aton mga kauturan, pero antes sini may mga restriksion kag gin-ban ang ila mga hilikuton.

Ang maayong balita sang Ginharian nakalab-ot sa Botswana, nga ginatawag sadto nga Bechuanaland, sang 1929. Pero sang 1941, ang mga tawo naakig kag nahadlok bangod sang World War II, kag bilang resulta, gin-ban sang gobierno ang aton hilikuton kag ang pagpanagtag sang base sa Biblia nga mga publikasyon. Sang gindula ang mga restriksion sang 1959, ginpadayon sang mga Saksi ni Jehova ang ila espirituwal nga mga hilikuton nga wala sing sablag.

Sang 1972, may bag-o nga kasuguan nga dapat magparehistro sa gobierno ang tanan nga organisasyon sa Botswana. Pero sang gintuman sang aton mga kauturan ini nga sugo, gin-deny ang ila aplikasyon kag ginhatagan lang sila sang 20 ka adlaw para untaton ang tanan nila nga hilikuton. Gin-ban ang mga Saksi ni Jehova sa Botswana! Ang bisan sin-o nga magapartisipar sa pagministeryo ukon mag-attend sa mga miting sa kongregasyon puede mapriso sing asta sa pito ka tuig. Bisan pa sina, ang aton mga kauturan nagatipon gihapon sing tago. Halimbawa, kon kaisa, ang mga miting ginahiwat sa wayang. Nadumduman ni Brother Tommy Maruping ang natabo sina nga tion, sia nagsiling: “Bisan pa may ara sang ban, mas nangin determinado pa gid kami nga padayon nga magbantala kag magtilipon. Nagsalig kami nga indi kami pagpabay-an ni Jehova kag amo gid sina ang ginhimo niya.”

Sang Pebrero 20, 1974, ginbag-o sang gobierno ang desisyon sini kag gintugutan na nila nga marehistro sing legal ang mga Saksi ni Jehova bilang isa ka relihioso nga organisasyon. Subong, may ara halos 2,400 ka manugbantala sa 42 ka kongregasyon sa Botswana. Ginahiwat ang mga miting sa Botswana Sign Language, English, Kalanga (Botswana), Setswana, kag Shona. Si Brother Hugh Cormican, nga nangin misyonero sa Botswana wala madugay sa tapos gindula ang ban, nagsiling: “Padayon nga ginapabakod sang mga kauturan ang ila pagtuo asta subong. Hilway na kami nga makasimba sing ululupod sa mga miting, asembleya, kag mga kombension, kag nakabulig ini sa amon nga maeksperiensiahan ang matuod nga paghiusa bilang mga katawhan ni Jehova.”

Ang pagbatas sang aton mga kauturan sa Botswana nagahatag sa aton sang dugang nga pamatuod nga padayon ni Jehova nga ginapakamaayo ang pagkamainunungon kag pagpaninguha sang iya mga alagad para ‘tumanon ang iya mga sugo.’—1 Juan 5:3.