Sa Brazil, mga 1,500 ka siudad ang wala sing kongregasyon. Ang pila sa sini nga mga siudad malayo gid katama kag madamo nga tawo nga nagaistar sa sini ang wala pa gid nabantalaan sang mga Saksi ni Jehova. Bangod sini, ang branch sa Brazil nag-organisar sang isa ka pinasahi nga kampanya para mabantalaan ini nga mga siudad. Ginhimo nila ini halin sang Septiembre asta sang Disiembre 2020. Para masunod ang protocol nga ginapatuman bangod sa COVID-19, ini nga kampanya ginhimo paagi sa sulat. Nagpakigbahin sa sini ang mga manugbantala halin sa 3,000 ka kongregasyon.

Ang mga manugbantala gin-asaynan sang siudad nga sulatan nila. Gin-research nila sa Internet ang mga impormasyon sa sini nga mga siudad para makahimo sila sang sulat nga bagay sa sitwasyon sang mga tawo. Halimbawa, ang isa ka payunir naghimo sang mga sulat para sa mga tawo nga nagaistar sa isa ka siudad sa estado sang Tocantins. Nabal-an niya nga ini nga lugar naapektuhan sang wildfire. Sa iya sulat, ginlakip niya ang ginsiling sang Bugna 21:5. Ginpaathag niya kon paano ‘bag-uhon ni Jehova ang tanan nga butang’ sa palaabuton kag kay-uhon ang halit nga nahimo sa duta. Pagligad sang pila ka adlaw, nakabaton ang payunir sang audio message halin sa isa ka babayi. Nagsiling ang babayi nga nanamian gid sia sang nabasa niya nga ‘masarangan sang Dios nga bag-uhon ang aton kabuhi.’ Gusto sini nga babayi nga makatuon sing dugang pa.

Maayo gid ang resulta sini nga kampanya. Halimbawa, talupangda ang gin-text sang isa ka tagbalay sa isa ka sister: “Kulang ang mga tinaga para mapabutyag ko kon paano kamo gingamit sang Dios para malab-ot ako. . . . Salamat gid! Bangod sa inyo, nagpati ako liwat nga palangga ako sang Dios kag ginaatipan niya ako kag ang akon pamilya! Pamatyag ko daw ginahakos niya ako. Bisan pa indi ko kamo kilala, sabat gid kamo sa akon mga pangamuyo! Salamat gid!”

Ang isa ka gulang sa Itamarati Congregation sa Petrópolis, Rio de Janeiro, nagkomento parte sa ginbatyag sang mga kauturan nga nagpakigbahin sa sini nga kampanya: “Pamatyag namon daw mga espesyal payunir lang kami nga ginpadala sa malayo nga teritoryo. Indi ini mahimo sang madamo nga kauturan sa normal nga sitwasyon bangod sa ila kahimtangan kag mga responsibilidad sa pamilya.”

Ginpakamaayo gid ni Jehova ini nga kampanya. Isa gid ka pribilehiyo nga makabulig kita nga ‘mabantala ang maayong balita sa tanan nga tinuga sa idalom sang langit.’—Colosas 1:23.