Sang Domingo, Septiembre 18, 2022, ginpahibalo ni Brother Hamilton Vieira, miembro sang Branch Committee sa Brazil, nga available na ang kompleto nga New World Translation of the Holy Scriptures sa Brazilian Sign Language sa jw.org kag sa JW Library Sign Language nga app. Sobra 36,300 ang nagtan-aw sang programa, nga gin-stream sing live halin sa auditorium sang branch office sa Brazil.

Amo ini ang una nga kompleto nga translation sang Biblia sa Brazilian Sign Language kag ang ikatlo pa lang nga kompleto nga sign-language nga Biblia sa bilog nga kalibutan. Ini nga proyekto sa translation ginsugdan sang 2006 sa Ebanghelyo ni Mateo. Pagkatapos sina, gina-release ang kada libro sa Biblia kon matapos ini translate.

Si Angellyca, isa ka sister nga apa, nagpabutyag: “Gintinguhaan ko sadto nga basahon ang Biblia sa Portuguese, pero indi ko ini maintiendihan. Subong nga may Biblia na sa Brazilian Sign Language, naintiendihan ko na gid ini kag pamatyag ko ara ako sa kada eksena!”

Ginporma sang mga Saksi ni Jehova ang una nga kongregasyon nga sign-language sa Rio de Janeiro sang 1982. Subong, may 9,500 ka manugbantala sa 246 ka Brazilian Sign Language nga mga kongregasyon, 337 ka group, kag 63 ka pregroup.

Ginapakita sang pag-release sini nga Biblia kon daw ano ka palangga ni Jehova ang aton apa nga mga kauturan. Ginapangamuyo naton nga ining matahom nga regalo magabulig sa madamo nga tawo nga magtuon parte kay Jehova kag sa iya Anak kag makita ang dalan padulong sa kabuhi nga wala sing katapusan.—Juan 17:3.