Ang 2023 amo ang ika-100 nga tuig sugod sang ginbuksan ang branch office sa Brazil. Sa sulod sining 100 ka tuig, padayon nga nagdamo ang mga Saksi ni Jehova sa Brazil. Ginapakita sini nga ginapakamaayo gid ni Jehova ang hilikuton.

Ang pagbantala nga hilikuton sa Brazil nagsugod antes sang 1900, sang ginpanagtag sa pungsod ang mga isyu sang Zion’s Watch Tower and Herald of Christ’s Presence. Madamo nga tawo ang nangin interesado sa sina nga magasin. Gani sang Marso 1923, ginpadala ni Brother J. F. Rutherford si Brother George Young sa sini nga pungsod para magbukas sang branch office kag organisahon ang pagbantala nga hilikuton.

Si Brother Young nag-arkila sang gamay nga opisina sa siudad sang Rio de Janeiro, kag amo ini ang nangin una nga branch office nga nagpanghikot indi lang sa Brazil kundi sa bilog nga South America. Naghimo man sia sang kahimusan para i-translate ang English nga mga publikasyon sa Portuguese kag dayon i-print ini paagi sa kompanya nga nagapang-imprinta sa amo nga lugar.

Sang 1925, ginpadayon ni Brother Young ang iya pag-misyonero sa Argentina, kag ginpili si Brother John Rainbow bilang branch overseer sang gamay nga opisina sang branch sa Brazil. Sang 1926, ginpadala sa Brazil ang isa ka gamay nga printing press halin sa World Headquarters sang mga Saksi ni Jehova sa Brooklyn, New York, U.S.A. Bangod sini makaimprinta na ang mga kauturan sang ila kaugalingon nga mga magasin kag mga booklet.

Sugod sang 1945, ang mga misyonero halin sa Watchtower Bible School of Gilead gin-asayn nga magbulig sa pagbantala nga hilikuton sa Brazil. Ginpakamaayo gid ni Jehova ang ila mga panikasog, kag halin sang 1948 asta sa 1968, nagdamo ang manugbantala sang Ginharian kay halin sa 1,000 nangin 50,000 ini. Sa nagligad lang nga tatlo ka tuig, sobra 21,000 ang nabawtismuhan kada tuig. Subong, may ara mga 900,000 ka kauturan ang nagabantala sang maayong balita sa pungsod. Bangod sini nga pagdamo, pila na ka beses nga kinahanglan i-renovate kag padakuon ang pasilidad sang Bethel. Sang 1980, ginsaylo ang branch sa banwa sang Cesário Lange, nga mga 150 ka kilometro halin sa São Paulo. Sugod sadto, tatlo ka beses na ginpadakuan ang pasilidad sang Cesário Lange. Subong, sobra 1,200 ka kauturan ang nagaobra didto.

Nalipay kita nga makita kon paano ginpakamaayo ni Jehova sa sulod sang nagligad nga isa ka gatos ka tuig ang paghimo sang disipulo nga hilikuton sa Brazil.—1 Corinto 3:7.