Gin-imbitar ang mga Saksi ni Jehova nga mag-entra sa 2022 International Trade Fair on Rehabilitation, Inclusion and Accessibility Technologies (Reatech) sa São Paulo, Brazil, nga ginhiwat halin sang Septiembre 1 asta 4, 2022. Ang Reatech amo ang pinakaimportante nga eksibit para sa accessibility technology (nagapatuhoy ini sa teknolohiya kag mga feature para sa mga tawo nga may mga kasablagan para makabenepisyo sila sa unod sang Internet) sa Latin America. Sobra 46,000 ka tawo ang nag-attend sa okasyon sini nga tuig.

Sa sini nga fair, nagbutang ang aton mga kauturan sang booth nga nagapakilala sang jw.org kag sang JW Library kag JW Library Sign Language nga mga app. Gin-feature sa sini ang interactive nga mga electronic display. May mga kauturan man diri nga bulag kag may diperensia sa panan-aw nga naga-demonstrate sang sarisari nga feature sang website kag mga app.

Nakabisita sa sini nga booth ang isa ka espesyalista nga nagabulig sa mga may kasablagan. Sia nagsiling: “Dayaw gid ako nga may isa ka relihioso nga grupo nga gusto gid magbulig sa mga tawo nga may special needs.” Ang isa pa ka bisita nagsiling: “Maayo gid ini nga paagi nga mabuligan ang mga tawo nga mabatyagan nga bahin man sila sang komunidad!”

Nag-attend man sa Reatech 2022 ang mga representante halin sa National Organization of the Blind in Brazil (ONCB). Naghimo sila sang mga radio broadcast sa sini nga okasyon. Sa una kag katapusan nga adlaw sini nga fair, ang mga brother nga nagabantay sang booth gin-interbyu para sa broadcast. Ginpaathag sang mga brother kon paano ginabuligan sang mga Saksi ni Jehova ang mga tawo nga bulag, may diperensia sa panan-aw, kag mga apa indi lamang sa Brazil kundi sa bilog nga kalibutan. Sa isa sini nga mga interbyu, ang representante sang ONCB nagsiling nga sa jw.org niya nakita ang pila sa pinakamanami nga mga content para sa mga apa.

Halin sang una asta subong, ginapakita gid ni Jehova ang iya pagpalangga sa mga tawo nga may kasablagan sa lawas. (Levitico 19:14) Kabalo kita nga nalipay gid si Jehova kay ginasunod sang iya mga Saksi ang iya gugma. Eksayted na gid kita nga maabot ang tion nga “ang mga mata sang mga bulag makakita, kag ang mga dulunggan sang mga bungol makabati.”—Isaias 35:5.