Sang Disiembre 3, 2023, ginhatag ni Brother Eduardo Martines, miembro sang Branch Committee sa Brazil, ang pamulongpulong sa dedikasyon sa isa ka Assembly Hall para sa bag-o nga Bible educational center sa Cabreúva, Brazil. Sobra 2,400 ka kauturan ang nag-attend sa programa sa dedikasyon sing face-to-face, kag sobra 4,900 ang nagtan-aw paagi sa videoconference.

Ining bag-o nga Bible educational center gamiton para sa School for Kingdom Evangelizers kag sa School for Circuit Overseers and Their Wives. Ini nga pasilidad dungan nga makahiwat sang tatlo ka klase, gani halos 600 ka estudyante ang makaeskwela kada tuig.

Sang 2020, ginbakal sang aton mga kauturan ang isa ka hotel kag ginhimo ini nga isa ka Bible educational center. Ginsunod sang mga volunteer ang mga restriksion bangod sang COVID-19 nga pandemic, samtang ginahimo ini nga bilding nga mangin 3 ka classroom, 54 ka kuarto, isa ka dining room, kag mga opisina. Pagkatapos sang konstruksion, may ginhimo nga mga kahimusan para sa isa ka open house. Ang tuyo sini nga okasyon amo nga mangin pamilyar sa mga Saksi ni Jehova kag sa aton hilikuton nga pagpanudlo parte sa Biblia ang mga nagaistar sa sina nga lugar lakip ang mga opisyal. Ang isa ka opisyal nga nag-tour sa pasilidad nagsiling: “Kanami gid sang inyo ginhimo diri kag de-kalidad gid ini. Kon may himuon kita para sa Dios, dapat amo gid sini.”

Si Brother Rogério Braganholo, nga nagbulig sa renovation, nagsiling: “Makita gid ang paggiya ni Jehova sa sini nga proyekto. Ang iya pagpakamaayo sa amon mga pagpangabudlay nagapahanumdom gid sa amon sang ginsiling sa Salmo 127:1: ‘Kon indi si Jehova ang magpatindog sing balay, wala sing pulos ang pagpangabudlay sang mga nagpatindog sini.’”

Nagakalipay gid kita sa pagbukas sining bag-o nga Bible educational center nga makabulig sa madamo pa nga mga kauturan sa Brazil para mag-uswag ang ila “kalantip sa pagpanudlo.”—Tito 1:9.