Linibolibo ka mga Saksi ni Jehova ang nanikasog gid nga mabantala ang mensahe sang Biblia sa mga tawo nga nagaistar sa malayo nga mga lugar sa Brazil. Ining pinasahi nga kampanya sa pagbantala nagsugod sang Septiembre 1, 2018, kag magapadayon asta sa Disiembre 31, 2019. Subong, sobra na sa 80,000 ka manugbantala ang nag-upod, kag sobra sa 16,000 ka pagtuon sa Biblia ang nasugdan.

Ang Brazil amo ang ikalima sa pinakadaku nga pungsod sa bilog nga kalibutan. Ginabulubanta nga mga 28 ka milyon ka mga tawo ang nagaistar sa mga probinsia. May 22 ka milyon man ka mga tawo nga nagaistar sa malayo nga mga banwa kag baryo. Sobra na 1,600 ka teritoryo ang nakadtuan sang mga manugbantala, kag ang iban sa ila kinahanglan magbiyahe sing sobra 2,000 ka kilometros para malab-ot ang mga tawo.

Naabtan sang isa ka manugbantala ang isa ka tigulang sa ila balay nga nagahanda sang mga liso sang kape nga iya ginpamupo. Ginpasulod sang tagbalay ang manugbantala kag gintawag ang iya asawa: “Dali ’di, mamati kita kay may ihambal sia sa aton parte sa Biblia!”

Madamo sang pamangkot ang mag-asawa. Namangkot sila parte sa kahimtangan sang patay, kon ngaa ginapasugtan sang Dios ang pag-antos, kon bala insakto nga maghatag sang ikapulo, kon paano solbaron ang mga problema sa pamilya, kag iban pa. Nanamian gid ang tigulang kay ginabasa sang manugbantala ang mga sabat sa Biblia. Nagsiling ang tigulang nga sina nga aga, nagpangamuyo sia sa Dios kon bala masabat pa ang iya madamo nga pamangkot. Ang tigulang kag ang iya pamilya nagtambong sa miting sa una nga tion sina mismo nga gab-i, kag padayon sila nga nagatuon sa Biblia.

Sa lain naman nga lugar, nagapamalaybalay ang mga manugbantala sang gulpi lang nagbundak ang ulan gani nagpasilong sila sa isa ka ­health center. Samtang didto sila, ginpamangkot nila ang isa ka babayi kag ang iya bata kon ano ang gusto nila ipangabay sa Dios. Ang bata nagsabat nga gusto niya makita liwat ang iya lola nga napatay. Ginbasa sang mga manugbantala sa ila ang mga teksto parte sa pagkabanhaw kag ginpatan-aw ang video nga Ang Pagkabanhaw—Malapit Na Lang Matabo.

Sang ulihi, ginkadtuan sang mga manugbantala ang babayi sa ila balay kag ginsugdan ang pagtuon sa Biblia upod sa iya pamilya. Dayon nagtambong ang babayi kag ang iya kabataan sa miting sa kaingod nga siudad kag nagapadayon sa pagtuon sa Biblia paagi sa telepono.

Gintagna sang Biblia nga ang Ginharian sang Dios may mga sakop “tubtob sa pinakamalayo nga mga bahin sang duta.” Ginapakita sining pinasahi nga kampanya sa pagbantala sa malayo nga mga lugar sa Brazil nga kabubut-on gid ni Jehova nga matuman ini nga tagna.—Salmo 72:8.